22年後重拍包青天　譚俊彥繼父業做包公：Daddy靚仔啲

「開封有個包青天....」TVB相隔22年再度翻拍經典劇《包青天再起風雲》，一眾演員包括由狄龍嘅仔仔譚俊彥、張振朗、胡定欣及姚子羚等人出席造型拜神儀式。譚俊彥飾演的2018版包青天保留了額頭上的月亮，但包公的招牌鬍鬚卻消失了，似乎有點失色，但點都好佢應該稱得上近代「最靚仔包青天」喇！譚俊彥接受《香港01》訪問時笑言感覺好奇怪，「我覺得daddy型過我！」

今日一入到廠就見到3個狗頭閘，譚俊彥見到就覺得好感觸，「因為細個跟daddy入舊電視城接觸拍戲工作就係佢拍呢套劇，我個陣有幻想過我會做包青天，所以而家好surreal。」睇返今日譚俊彥嘅新造型，似乎就無過往包青天經典黑面，他表示，「因為現時的拍攝器材換了全高清製式，好多嘢要調教，今日我地會做camera testing，會唔會再黑啲可能會嘅，但呢要今日試埋先知。」但令佢感到搞笑嘅，就一定係幫佢嘅化妝師，「當年佢幫我daddy化，今日就幫我化，好犀利。（點解無鬍鬚？）都係監製要求，佢希望成件事年輕化，有唔同嘅感覺。」他指因為今日是記者會怕弄髒所以無搽黑對手，之後正式開拍就會上色。

記者笑言今次他飾演的包公應該算是近代最靚仔包青天時，譚俊彥就好謙虛咁話，「我覺得好多飾演過包青天嘅演員都好靚仔，好似李東學咁。（咁daddy呢？）緊係佢靚啲喇，但始終年紀唔同，我而家40歲，佢嗰陣拍嘅時候接近50歲，階段都唔一樣。今次會好得意，有啲新火花。」他透露爸爸狄龍知道他飾演2018新版包公，但就無過兩招俾佢。