【溏心風暴3】爭產劇套路再出現　米雪關菊英終於爆seed

無綫50周年台慶重頭劇今晚播出第3集，昨晚那集臨結尾講到飲醉酒的黃宗澤上了好友翠如BB的屋企，好似想生擒睡在床上露出白滑美腿的翠如BB咁樣，睇到觀眾都好緊張。今集一開場就即刻交代返個後續，原來黃宗澤埋翠如BB身，只是要拿翠如BB攬着的枕頭，之後就自己走返出去做廳長。而翠如BB出完呢一幕，就成集都無再出過場喇。

不過睇得《溏心》系列，就當然是要睇主角們的嗌交場面啦，頭兩集氣氛都好似好和睦咁，但到了今集就開始有火花喇。以往在過去兩輯中經常嗌交兼主力鬥嘴的米雪同關菊英，就為今輯的嗌交戲揭開了序幕。事緣講關菊英受朋友所託，向身為校董的米雪推薦朋友個仔入學做插班生，米雪答她話：「如果係好嘅學生，我哋學校求之不得。」關菊英一心以為米雪應承取錄個學生，點知原來無。關菊英即刻衝入校董室同米雪理論，兩個就互寸互窒，亦因此而埋下了不和的伏線。

另一個看點就是情深的王浩信同岑麗香在雨中浪漫重逢。雖然第2集兩人在香香家拜年時有見過，但當時香香當浩信透明。今集就唔同喇，講香香駕車途中遇到電單車失事受傷的浩信，香香為他撐傘又安慰他及幫他Call救護車，兩人終於正式相認，之後香香仲去醫院探望浩信添，令浩信愈來愈迷戀香香，完全係情根深種呀。