【降魔的番外篇】黃建東為正劇受歡迎感壓力　白色底褲上陣抗衡

劇集《降魔的》落幕，與正劇互相呼應嘅網劇《降魔的番外篇—首部曲》定於12月1日在Big Big Channel上架，於正劇中飾演戀襪癖的黃建東，去到番外篇終於正常返，首次擔正嘅佢於網劇中飾演科學家古尼。「因為我是一個懶叻科學家，嘴邊經常掛着一堆專有名詞，但現實我的科學程度只達到中三，所以記得好辛苦。」正劇備受觀眾喜愛，黃建東表示因而有點壓力。「怕大家會比較，但《番外篇》其實係走輕鬆、搞笑路線，加上CG真係做得非常勁，所以希望觀眾都鍾意。」

他回想拍攝時需其中一場需要吊威也，由於當時減磅未成功，令拉威也的工作人員極為辛苦。「當工作人員拉起我時會話呢個特別重，要叫多幾個人幫手，見到佢哋辛苦到好似要拉起隻河馬咁，搞到我有啲愧疚。」由《番外篇》開拍至今已有半年多時間，雖然黃建東經常話要減肥，但似乎丁點成果都見唔到，連他自己也笑言愈減愈肥。「之前為新劇試造型，監製講咗4次『黃建東真係好肥』，同埋由於我在劇中係一名教授，好受女學生歡迎，為了這原因，我真係下決心要瘦身。」