【出貓特攻隊】Nonkul同家燕姐跳十字舞揾銀　明年去美國升學

泰國電影《出貓特攻隊》今年8月上映時掀起一陣熱潮，票房成績咁好當然帶挈一班演員，戲中飾演「賓爺」的小鮮肉Nonkul昨晚就特意到香港，與薛家燕出席荷里活廣場舉行的「賤萌熊舞動爆笑聖誕」啟動禮聖誕宣傳活動。雖然電影在暑假上映，但Nonkul的人氣仍然keep得住，著住紅色西裝嘅佢都好識做一出場就用半鹹淡廣東話，「聖誕快樂！我係nonkul」之後仲同家燕姐battle十字舞！

原來今日Nonkul身體都有點不適，但他表示見到粉絲們即刻好返曬，今次Nonkul只逗留24小時就離港，問到幾時會再嚟香港見下粉絲時，他透露，「其實我姨媽住係香港，所以周不時都會去香港玩同shopping。我最鍾意香港嘅小食同甜品，一陣都會買返去俾屋企人食下。」至於今年聖誕節他就選擇留在家中與家人渡過，「聖誕節都周圍好多人，我同家人都唔鍾意去人太多嘅地方，所以節日都會留係屋企過。」

至於之後嘅動向，今年讀大學Year 4嘅Nonkul透露，「聽日就要去返學，希望可以儘快完成學業，如果有工作都會一路接，但學業為先。」但以下嘅消息應該令不少粉絲心碎，因為Nonkul指希望大學畢業後可以到美國留學，咁一班fans點算好？Nonkul笑言，「如果真係留學嘅話，都可以搞下fans meeting，都會繼續見面。」