【兵仔講兵法】睇《獵場》學追女攻略　辦公室戀情明知錯都要去馬

胡歌主演的電視劇《獵場》，近日引起了不少話題，比起爾虞我詐的商業戰爭，他的感情世界相信更多人關心，而男神亦終於有着落，跟公司的女同事拍拖，心水清的劇迷不難發現，他的戀愛對象不是合作夥伴，就是公司同事，根據「喺度食唔好喺度屙」的潛規則，商業奇才胡歌似乎不大理智，現實是講就容易，兵仔在辦公室有否遇過女神，令你返工都變得特別有意義，究竟打工仔在公司追女仔是否死罪呢？

反對在辦公室拍拖的大有人在，理由其實好現實，就係拍影響飯碗，老細一句爆你：「公司請你返嚟係做嘢，唔係溝女呀！」觀感就梗係即時跌到落谷底，斷估無幾多個老細係鼓勵下屬積極在公司搵對象啩？在老細立場，打工仔的返工時間已賣了給公司，做私人嘢梗係死罪，咁拍拖算不算私人嘢，不用多說啦。當然你可以企硬話拍拖不會影響工作效率，事實係同事若然升級成男女朋友，只要一方受到責難，另一個就一定不好受，問心自己是否真的做到毫無私心，老細對女友開火，自己只能做「忍者小靈精」，男性尊嚴掃地，如果一時衝動反爆老細，就隨時飯碗不保，的確是人生交叉點。

情侶在蜜月期當然想見足365日，但世界上不止有「日久生情」，在公司日對夜對，又會否欠缺私人空間而「日久生厭」，甚至當情侶嗌交時，仍然侷住要返公司，彼此欠缺一點降溫時間，分分鐘在公司炒大鑊，結局又是指向影響飯碗。如果出現最嚴重的分手情況，仲要日日見住面，開聲做衰人那位會內疚，被飛者更加會傷心難過，咁又有乜謂呢？若然分手時超級不愉快，到達「再見不再是朋友」級數，有你無我嗰隻，其中一位辭職已經是意料中事，能夠繼續冷靜理智地做同事，相信彼此感情在分手前早已進入冰河期。

講咗咁耐，辦公室戀情似乎是一種打工仔魔咒，但係咪因為咁就要鐵定心，只要是同事就要成為情人blacklist，鍾意咗都不敢去愛去追求呢？如果鍾意一個人，要左計右計，又要睇老細面色，又怕同事閒話，咁仲係咪真愛呢？真心愛一個人，你不會去介意是否會打爛飯碗，愛情從來都不是理智的產物，遇上啱嘅人點解不敢去馬？就是那個同事身份，講真大部分人打份工都是幾年貨仔（除了公務員），但一個啱嘅人就隨時陪你一世，何況轉工唔難，但要遇上真心摰愛就好講緣份。兵仔如果每日好想返工，好想見到女神，不要再等啦，快快向女神表白，記住女神身邊不止你一個兵仔，仲有好多敵軍，一不留神女神俾人追咗，日日俾「閃光彈」襲擊就真係嘔血啦。