《開心速遞》KC扮女傭姐姐零違和感：最緊要觀眾開心鍾意

大家仲記唔記得歐瑞偉在無綫劇集《愛．回家之開心速遞》入面，曾經扮過美少女戰士？而他在昨晚播出的一集中，又再一次扮女人喇。不過今次就沒有上次扮美少女戰士惡搞電影《格雷的五十道陰影》咁重口味，他今集只是扮一個好生活化的鐘點女傭，為了掩人耳目，他還特地戴上口罩扮病，所以基本上連女人妝都不用化，驟眼睇真係似十足個阿姐咁㗎。

今集劇情講歐瑞偉所飾演的KC喬裝女傭來照顧患病的Helen（姚盈盈飾），見KC著上格仔圍裙配襯黑色長褲仲要穿上睡拖，再加埋個冬菇頭髮型，戴埋副眼鏡，即刻成個女傭姐姐上身咁樣，就算KC平日幾咁有型，但這個造型跟他都毫無違和感呀。而他為了不讓Helen識破自己其實是KC這個真正身份，就刻意戴上口罩，話自己喉嚨痛講唔到嘢，不出聲只露出雙眼的他確是呃到下人。不過只要細心看真一點，見他條眉咁粗，都可能會懷疑他是男扮女裝。KC不只扮女人，更扮埋超人，大玩cosplay，KC搞笑果然有一手。而今次已是他第4次扮女人了，唔怪之得咁熟手啦。他亦絕不介意扮女人：「扮女人無咩特別感覺，都係跟個角色行，劇情需要我咪扮囉，最緊要觀眾開心同鍾意就得喇，大家睇完可以笑下。」