【溏心風暴3】蔣志光入無綫30年仍然好享受：我冇翻炒自己

《降魔的》播完，緊接的《溏心風暴３》又有蔣志光，這個萬能老倌，幾乎套套劇集都有份，原來不經不覺在無綫做了30年，上週三（22日）他獲贈30年服務金牌，一向內儉的他亦覺得時間過得太快，他說：「TVB有樣嘢好得意，佢一路運作緊，你每日都拍緊嘢，時間就係咁過咗去，所以有啲同事做咗10年、20年更加唔覺，因為我哋不停咁拍嘢，回頭一望已經30年，之前公司打俾我，叫我今晚嚟出席，我先醒起......」

人生有幾多個10年，更何況是30年，蔣志光原本只想做電視台「過客」，沒想到一做就是30年，他說：「當年我冇再做樂壇，都要揾個地方落腳，最接近嘅地方應該係TVB，但嗰陣真係從零開始，就係咁，都唔知自己點解做咗咁耐？有句說話我哋成日講，千祈唔好話自己喺呢度（TVB）過渡咋，過過下就喺到唔走得。我諗我餘生都喺TVB過喇，哈哈哈！」

蔣志光是不少人心目中的最佳綠葉演員，不論《降魔的》學識淵博的有為，或是《老表，你好hea！》的隱世歌王高音，每一個角色都拿捏準確，但阿蔣表示自己最初十分迷濛，他說：「初入嚟TVB都辛苦，因為呢份係自己完全唔認識嘅工作，我仲記得嗰陣同蘭子、修哥做《點解香港咁過癮》，蘭子成日投訴我，點解佢做乜，我就跟住做乜？當時嘅我因為唔識，只能copy人哋。」蔣志光係唱作人出身，要一個崇尚創作的人做copy cat，當然非常難受。

阿蔣在無綫做了30年，做到時間都忘記，亦即使演員這份工作不是他的首選，但他從來沒有「揸流灘」，在《降魔的》其中一幕，他驗正到自己沒有hea做，他說：「《降魔的》我可以分演四個角色，我好慶幸，因為4個角色都唔同性格，講嘢方式有唔同，証明我冇翻炒到自己，我冇食老本就算，因為如果自己冇突破，你一定會相同，正如我希望即使我著同一款西裝，戴同一款眼鏡，但我要演到唔同嘅律師，我希望每個角色都賦予生命，做演員如果只係重複自己，其實好辛苦，亦對唔住觀眾，自己亦唔享受，如果係咁，不如唔好做，我嘅態度就係咁。」

阿蔣為人低調，雖則每個角色都用心，但他覺得自己不會再是焦點，觀眾會忘記了他，直至《老表、你好hea！》出現，他說：「咁多年，其實係呢一兩年有突破性發展，我先知原來觀眾冇忘記我，估唔到仲有人鍾意聽我唱歌，我先多返份唱歌嘅工作，我係感受到自己同觀眾近咗，雖然我終極夢想唔係演員（他想當導演）但我而家做嘅係回饋佢哋，既然佢哋睇得起阿蔣，覺得我仲有前進空間，我就唔想令佢地失望。」