【齊癲大聖福祿壽】李思捷扮完丁蟹　恒指勁跌400點

王祖藍、李思捷、阮兆祥主持的《齊癲大聖福祿壽》接力《我愛EYT》，成為11月台慶綜藝節目，見到呢個組合，就知一定離不開「扮嘢」，首集先係有阮兆祥扮《同盟》中鮑起靜飾演嘅令熊，第二集到王祖藍扮陳自瑤，暗串老公王浩信喺《踩過界》中艷福無邊，而昨晚播出的第三集到李思捷發功，向來扮蔡楓華同鄭少秋十分神似嘅佢，今次就揀咗鄭少秋喺《大時代》中嘅丁蟹嚟惡搞《胡說八道真情假期》，以花心丁蟹一角，周旋於「胡說八道會」6位姊妹當中，企圖破壞她們的友誼。

丁蟹效應相信大家都聽過架啦，多年來，只要鄭少秋有作品推出，恒生指數都會有唔同程度嘅下跌，就連今年初他為慶祝入行50周年演唱會宣傳，股市都急挫272點，真係好鬼「邪門」。不過，最邪嘅係，昨晚（22日）李思捷扮完丁蟹，今日（23日）恒指曾經一度跌409點，結果收市失守3萬大關，以29707點收市，較昨天跌295點！呢個世界似乎已經無嘢可以阻到丁蟹效應，難怪唔少網民尋晚一睇到《齊癲大聖福祿壽》，都話要入番幾手啦。