【連坐法】TVB封殺令雙重標準 周柏豪胡杏兒周秀娜無影響?
撰文:洪曉璇
出版:更新:
蕭定一旗下藝人包括張繼聰、鄭欣宜、胡杏兒、張智霖等呢一年以來,如常亮相TVB,點知忽然傳出因為官司問題,TVB決定全面封殺阿一旗下藝人,犧牲嘅又點止張繼聰一個,據知蕭定一旗下藝人全部無限期被TVB禁亮相,好似阿聰咁拍完嘅劇集即使播出,都唔需要佢出現宣傳。有傳鄭欣宜同BabyJohn都會被消失,年尾頒獎禮成為炮灰,但周柏豪又獲豁免噃,雙重標準好亂呀﹗蕭定一回應香港01查詢時就話:「我哋公司唔介意做或者唔做TVB嘅任何訪問。」
數阿一旗下藝人,其實好多位今年都有幫TVB工作,好似胡杏兒大住肚飛到澳洲拍攝《胡說八道真情假期》;周柏豪、連詩雅、何浩文拍《使徒行者2》;鄭欣宜、BabyJohn拍《老表畢業啦》,趙永洪嘅《踩過界》同《降魔的》等,官司都開展了一年,一直都相安無事,無端端因為咁而玩封殺,實在令人摸不着頭腦。
傳聞指周柏豪、連詩雅、陳瀅等雖然同屬蕭定一旗下,不過因為經理人合約歸STARZ People,所以獲豁免於封殺名單之外。心水清嘅網友就話,TVB根本就係大細超,9月都仲播緊暑假先拍嘅《胡說八道真情假期》,又搵周秀娜首次拍TVB劇《宮心計2之深宮計》,如果要翻臉早應該喺去年官司開始就出手,網友質疑TVB係拎張繼聰嚟祭旗,引起大家對收視低迷嘅《誇世代》注意。
我地向蕭定一公司查詢關於封殺一事嘅傳聞,回覆話:「每間公司有每間公司唔同嘅政策,我哋公司唔介意做或者唔做TVB嘅任何訪問。」另外趙永洪亦係阿一旗下藝人,佢有份參演嘅《降魔的》將會喺星期日晚播出大結局,台前幕後會一齊睇直播,據知趙永洪亦有收到邀請,但他當日有TVB其他劇集通告未能出席。咦,說好的全面封殺呢?
+3