【淘寶騙案】明星同款有保證？ 范冰冰Baby慘被PS「亂換衫」
撰文：洪曉璇
出版：更新：
早前雙11淘寶單日銷售額高達$1682億人民幣，大家唔知貢獻咗幾多呢？藝人著過用過嘅衫褲鞋襪，好似特別有保證，網購嘅方便，令大家更容易買到心頭好，用明星圖一search就可以搵到大堆「明星同款」商品，雖然明知係仿製，不過好多人著款唔著牌子，同偶像著一樣嘅衫自我感覺特別良好。不過，如果個星根本無著過，咁又點計好？
上到淘寶網，可以搵到數以萬計「范冰冰同款」商品，都唔好計較正牌定冒牌住啦，外形相似都大受歡迎。不過原來好多都唔關范冰冰事，而係PS大神嘅功勞，事關有冰冰粉絲發現，好多聲稱係「范冰冰同款」商品，佢根本無著過無用過，而係賣家key圖！
冰冰嘅粉絲將淘寶照片上傳微博留言話：「我…覺得…有點…怪怪的？！」睇番啲相，好幾張范冰冰嘅表情都一模一樣，有啲就係個人同背景光線明顯有出入，成個好似飄浮一樣，好3D喎﹗范冰冰本人都有轉載呢篇微博隔空向淘寶賣家話：「呃…那個⋯能不能別給我亂（PS）穿衣服，說真的，我也是要面子的。好嗎？」今次真係唔知好嬲定好笑啦。
受害嘅又點止范冰冰一個，隨便一search就可以見到楊冪、Angelababy都有「被著衫」，好多呢類假圖，都會將藝人key上紅地氈，後面有大堆面目模糊嘅記者瘋狂拍照，令大家感覺上件衫可以出大場面，價錢都可以標得高啲。以前就話有圖有真相，自從PS大神出現之後，呢個世界變晒啦，就算買家秀都可以造假，唯有自求多福啦。
+14