【收視分析師】《降魔的》力壓《誇世代》 馬國明：口碑最緊要
歡迎收睇逢星期三中午嘅《收視分析師》，上星期大市整體氣氛由《降魔的》為主導，在網友同觀眾的熱烈帶動下，升幅續擴至0.9點，平均為25.4點，曾高見25.9點再創一個月高位。至於8點半的《誇世代》，倒跌0.6點，收報23.9點，劇集未有太大驚喜，中場收視表現較為疲乏。《降魔的》與《誇世代》兩者相差1.5點，即係前者幾乎多10萬名觀眾睇過。《降魔的》上星期進入戲肉，上演一幕又一幕的動人場面，這幾幕催淚彈令不少觀眾都為之動容。
對於《降魔的》跑贏大市，更差0.1就到馬明心目中「好高」的位置，《香港01》亦特意找來馬國明傾幾句，不過他對收視有另一番見解，他說：「而家嘅收視好難統計，好難要求觀眾8點半9點半返到屋企坐低睇電視，我見有好多人都會第二日返工搭車或者食飯先睇，大家睇電視習慣已經改變了，對於我哋嚟講，最重要口碑好，亦證明監製同編審嘅劇本好。」至於會否希望拍攝第二輯？馬明就以自己2012年的作品《On Call 36小時 》做例子，「當時第一輯好成功，但到《On Call 2》講真我覺得係有些問題，原因係第一輯嘅編審之後離開了公司。所以《On Call 2》搵咗第二個編審寫，其實要生多一個故仔好難，所以當時嘅反應未有太好，我覺得要開續集嘅大前提係咪真係有得寫落去，我覺得呢點要留意！」馬明的意思真係呼之欲出，簡單來說，就是見好就收，不要拍到觀眾覺得爛才懂得收手。
至於8點半播出，幾乎TVB全台總動員的《誇世代》播到今日13集為止，由於支線多，追看位未集中，令收視有壓力，本周更比上周微跌，只得23.6，但最近各位主角陳豪、森美同李佳芯，都開始多人討論，希望會有幫助。
雖然本周收視和《降魔的》相比只差1.5點，但論兩套劇製作成本及演員陣容來比，其實《誇世代》收視是輸得慘烈，記住強調的是收視，容後會解釋，由此可見，大堆頭掛帥未必帶動到收視，以今次《誇世代》為例似乎就未有太大幫助。
更不利的情況就是下星期一開始就會播出重磅藍籌股《溏心風暴3》，兩輯平均收視分別32點及35點，這麼亮麗嘅往績，加上儲了十幾年的「溏粉」，監製劉家豪亦一向計算準確，我大膽推算《誇世代》會有更大壓力，除非劇情上追看性加強，否則遇到《溏心風暴3》，《誇世代》將會被恐慌性拋售。
不過一套劇成敗，神劇定膠劇，係咪只用收視來衡量，答案當然唔係啦，好似2011年的《天與地》當時收視唔理想，但到現在依然被不少人稱為神劇，劇中那些對白，「This city is dying」 「香港人最擅長就係善忘」依然嗒落有味，証明收視只係一時，劇集質素先係永恆。
《誇世代》係咪神劇未知，其實監製陳維冠，編審鄭成武，咁有經驗嘅製作人，如果要穩陣，攞住台慶劇嗰朵、人腳整套爭產劇實爆喎，Bobby同陳豪爭產，再爆出同阿田、李佳芯有姦情，原來又同張繼聰有road，頭15分鐘床戲，最後15分鐘大龍鳯，女主角互摑50巴，必定收視40點，討論區日日洗版，但佢哋冇咁做喎，《誇世代》明顯想做一啲唔同嘅嘢，唔想做一套見慣見熟嘅台慶劇，唔想食老本，想創新好多時都有個陣痛期，收視蝕少少係值得嘅，甚至下星期對住《溏心風暴3》，輸得好慘又如何？千祈唔好氣餒，行返舊路，因為求變先係最重要，大台最需要的就係夠膽改變嘅勇氣。