【超多圖】Victoria Secret首登上海舞台 奚夢瑤慘仆成焦點
愈來愈多國際品牌，劍指中國市場，發布新一季作品時都會考慮移師內地。國際著名內衣品牌Victoria's Secret，首度移師上海舉行年度內衣騷，除咗佢地嘅新一季靚衫，踏上呢個舞台嘅VS Angels更加係身份象徵。呢次去到中國舞台，VS搵嚟7位內地超模參與演出，同一眾國際超模同場較勁。完騷後奚夢瑤登上網上熱搜榜，唔係件衫太性感，而係佢喺舞台上意外摔倒成為焦點。
VS Show最早喺1990年代於紐約上演，曾經移師各大城市舉行，但今次都只係第4次到美國以外地方舉行，每次都會吸引上百位名人藝人出席，能夠入場都係身份象徵，由於門票唔會公開發售更顯珍貴，首次去到中國令內地名人趨之若鶩，門票竟然被炒到35萬人民幣一張，認真誇張。英國男子組合One Direction（1D）成員Harry Styles、東尼獎得主Leslie Odom Jr.、格林美獎得主Miguel，以及內地天后張靚穎擔任表演嘉賓上台獻聲。
今年一共有87套成品，38對ANGEL'S WING，27歲巴西超模Lais Ribeiro著上取名「香檳夜」嘅Fantasy Bra，以黃金葉片鑲嵌近6000顆珍貴寶石，其中包括藍寶石、黃色藍寶石、藍色黃玉和鑽石，重量超過600卡約1,500萬港元嘅。７位內地超模代表主場迎戰各地超模，包括首位踏上VS 騷嘅中國超模劉雯、6度登上VS舞台嘅何穗、同樣多次行VS騷的奚夢瑤與雎曉雯，聯同中國真人秀《天使之路》直接晉級的冠軍王藝、模界新星謝欣及來自法國嘅華裔模特兒陳瑜。
劉雯同何穗兩位師姊換足兩套性感內衣，同一線國際model睇齊，不過焦點就落咗喺今年28歲嘅奚夢瑤身上。之前佢喺節目上曾經講過：「如果維秘（VS）摔了就退休」，點知一語成讖，佢以一套薄紗內衣上陣，背上揹住散開花束仙氣逼人，以招牌甜笑自信行天橋，點知唔小心踩到自己件薄紗成個人跪低，但佢第一件事唔係馬上爬起身繼續行走秀，而係跪喺地上整理服飾後，再由其他model扶起身完成表演。