【3日2夜．多圖】陳庭欣遊斐濟繼續三點式 禁色令後仲有無得睇？
撰文：洪曉璇
出版：更新：
TVB忽然推出禁色令，講明公司不鼓勵拍劇或綜藝節目時，有太過誇張女性身材或者賣弄性感的鏡頭，有傳禁令正正針對近期捧出多位女神嘅旅遊節目《3日2夜》。「工作指引」推出後，18號晚播出陳庭欣（Toby）斐濟之旅第二集，係就係仲有三點式，不過仲有一幕係Toby喺泳衣外套上潛水衣，唔少網友慨嘆，以後睇女星游水都可能會著鯊魚裝……
禁色令寫明，日後女藝員如果需着上三點式泳衣拍攝，例如進行水上運動、浸溫泉等鏡頭，會在適當時候安排穿上T-shirt。推出工作指引時間咁啱喺《3日2夜》播出陳庭欣到斐濟兩集之間，大家都好奇節目會唔會受影響。拍就一早拍完啦，相信TVB唔會KEY件T-shirt咁突兀，不過會唔會重新剪接就真係要等播出先知。最終新一集陳庭欣繼續有著泳衣，仲有三套咁多！
節目中Toby著上黑白連身deep V泳衣玩海上划艇，有陽光有靚女賞心悅目，見佢隻艇離水上屋有一段距離，都應該拍咗起碼大半個鐘，最終出街，就只有6秒鐘。另一套泳衣黃綠色比堅尼就用嚟拍mood shot，即係行行企企擺pose配旁白嗰種，配埋斐濟嘅日落，係靚嘅。
不過大家最深感受應該係第三件泳衣，一直影住toby半身，佢望住鏡頭介紹斐濟玩意，然後，著上一件潛水衣，唔止封胸，封到連鎖骨都見唔到，網友話拍攝時就好似神預言一樣，預知有禁色令推出，睇怕以後女藝人都要買定鯊魚泳衣出埠啦。斐濟之行播完之後，到底仲有無《3日2夜》？查看官網暫時見11月25號晚繼續會播放，據知會係朱智賢遊首爾，到時播出仲有無浸溫泉同落水環節呢？真係要留待下回分解啦。
+10