張彥博孖劉佩玥做夫婦：有佢喺身邊真係好幸福

自《一屋老友記》後，張彥博經常孖住劉佩玥「有你有我」，合唱一曲《你認真嗎》更得到不少網民讚賞。二人日前為連鎖快餐店拍攝廣告宣傳片，關係更晉升為夫婦，而為配合「劇情需要」，劉佩玥不時向阿博詐嬌以及放電，但阿博可能太過緊張及投入拍攝，全程表現唔過電，絕對係暴殄天物。

已經合作過N次，張彥博同劉佩玥雖然零尷尬，但阿博就話其實每次見面都有啲擔心。「阿MOON惡嘅時候可以好惡，我每次見到佢咁嘅樣都會怕怕，都會好乖咁聽從女王MOON嘅指示，阿MOON其實係我拍戲時嘅督導。」阿博之後再補充表示：「佢實在太了解我，所有優點同缺點都知道晒，真係好難做情侶，做老友就OK，唔使點出聲佢就知我想點，有呢啲朋友喺身邊真係好幸福。」

廣告中，阿博陷入婆媳糾紛之中，問他會否擔憂將來也遇上此問題，他笑言無有怕，並指自己非常腍善：「我就算俾人話都唔會反擊，所以應該無事，我反而覺得將來可能係老婆同阿媽一齊管我，不過如果係咁都幾好，等她們多點機會培養默契。」