【降魔的】劉佩玥張銀紙咁假都播出街？　原來驚咗金管局

《降魔的》進入第二周，這套看似牌面弱的劇集，愈戰愈勇，討論區每晚都洗版討論，網友大部份都是正評，唯獨昨晚第9集，大家對劇中有幾個鏡頭，就是劉佩玥用1千蚊引誘馬國明，那張1千蚊令網友充滿「黑人問號」，「點解啲錢要blur咗佢？」「D錢點解要咁假？」「使徒行者2原本D錢好真，之後都好假」有人覺得大台改不了事旦，其實無綫這次被迫事旦，因為拍攝上出現鈔票，原來事前要經過繁複的申請........
 

《降魔的》監製方駿釗接受《香港0１》訪問，他表示因為廣播條例有說明，他說：「由以前到而家拍到銀紙呢，我哋都盡量避，我記得要向金管局申請，而且都需時幾耐，我哋嘅做法就係用後期遮咗啲錢佢。」監製所講的條例，其實金管局網頁有列明，條例如下：「根據《香港法例》第200章《刑事罪行條例》第103條，任何人士如欲以任何形式複製任何香港紙幣或其任何部分，必須向金融管理專員提出書面申請。遞交申請時不得隨附任何複製品，因為此舉可能已構成違反《刑事罪行條例》第103條，如金融管理專員批准複製，有關人士還須徵詢有關發鈔銀行的意見，以防複製紙幣會侵犯其版權。」《香港01》亦打去金管局查詢，原來申請都真係好煩。

金管局職員回覆：「拍攝任何香港法定貨幣（紙幣及硬幣），正式嚟講係要申請嘅，可以透過書面或者電郵，解釋下拍攝內容、播放日期，時段，之後我哋會有專人聯絡拍攝單位，再同佢哋詳細傾拍攝細節，完成後會得到一封approval letter，有咗呢封approval letter，大約４至５日，就可以去政府新聞處申請另一封approval letter，有齊兩封就可以拍攝。（如果冇申請，又用真錢拍攝，會唔會有專人捉？）呢方面就答唔到，（TVB用真錢拍攝，但用後期遮走，又得唔得？）咁呢方面亦未有指引。」只可以說制度相當嚴謹啦，拍一個銀紙鏡頭要申請兩封信，唔怪得知TVB要諗計走精面啦，等得你兩封信，套劇都煞科啦。