【森美旅行團】高海寧做食評家夠真心：真係好味嘅呃唔到人

睇無綫節目《森美旅行團》最令大家開心的除了是有得睇高海寧 (高Ling0、黃心穎兩個靚女浸溫泉兼同場加映森美騷肌之外，相信一定是睇幾位主持人介紹各種美食喇。在尋晚播出的一集就介紹了幾間東京人氣食店，包括高級壽司店、抹茶盛宴、水果甜品店以及漢堡包店。既然介紹得自然間間都有返咁上下水準啦，而當中的美食經高Ling真情流露七情上面加上用詞豐富而又有層次的描述後，就變得更加美味同吸引了。

而高Ling的食後感都好有參考價值，絕非那些只會不停話好好味又或是甚麼有口感一類hea爆食評可比。例如：「醬油入面滲出柚子香味」、「香之餘帶甜味」、「有啲煙燻味，好似拎好多木頭喺下面燻嘅味道」、「將啲蟹膏混入蟹肉搗碎然後拎去炸，咬落去好似爆漿咁」等等。有網民甚至大讚高Ling似十足食評家「形容到我好似食到啲味道咁」，就知高Ling言之有物，有料到啦。

香港01記者就電話訪問了高Ling，並告知她的食評大獲好評，她說：「我真係好鍾意食嘢，好為食，我只係將食到嘅味道講出嚟，形容多啲，係自己最真嘅感覺，係本能嚟。(可以轉做食評家？) 無咁誇張，一向都好enjoy食嘢，以前拍過好多飲食節目，所以啲朋友好多時都會問我有咩好嘢食推介，尋晚嗰集播出咗之後都有好多人問我，因為有啲朋友嚟緊都會去東京旅行。」

高Ling坦言所講的食後感完全是發自內心的：「我係真心覺得好食，我個樣會表現晒出嚟，好味嘅話我會講到好興奮，呃唔到人，亦都唔想呃人。嗰個蟹漢堡真係好好食，真心推介，好驚喜，好鮮味好濃郁好足料，通常去日本都唔會特登走去食漢堡㗎嘛，點知原來係咁正，依家仲回味緊。我嗰日都即刻加咗間店個老闆嘅ig，驚第日搵唔返間店，百幾蚊一個其實係好抵，好值。」成日食食食怎樣可以keep住身材呢？高ling說：「我拍時有肥到㗎，以前係一集比一集肥，依家我學識喇，淨係拍嘢時先食嘢，放飯時就唔食，咁就唔會一日食成6、7餐。我拍嘢時會盡情食，因為我真係好鍾意食嘢，同埋如果唔係咁觀眾feel唔到有幾好食。」