張繼聰回憶７年前和謝安琪同抑鬱：當時食行藥好口乾好頭暈好攰

張繼聰向來都好感性兼又喜歡跟大家分享他的生活點滴與感受，昨晚凌晨時份阿聰就突然有感而發，於facebook寫了一段講述自己七年前患有重抑鬱，但仍出席叱吒頒獎禮撐太太謝安琪 (Kay) 獲得叱吒樂壇女歌手銀獎的事，亦唔介意令人諗返起他曾經有過「廢柴老公」這個稱號。他透露頒獎禮當晚因為「食行藥，所以「好口乾，好頭暈，好攰」，而他當時的心情除了開心感動之外，其實同時都「好驚好怕，好擔心食白果嘅我唔知又會比人點嘲笑，總之九萬幾個層次又li 又lu .....」當年阿聰的成績無論在樂壇或影壇都確實平平，太太Kay卻正值事業的高峰期，作為男人且是人夫的阿聰所承受的壓力，唔使講都知一定是很大很大。

他又指原來太太Kay當時亦都和他一樣「抑鬱病都好猛烈，承受好大嘅壓力」兩公婆可謂同病相憐。他形容自己與太太都是「考緊宇宙俾我 (同佢) 嘅試」Kay當年咁好成績卻竟然並不快樂，這亦令阿聰參透了一個大道理「你話世界係幾奧妙？快唔快樂，原來同得到幾多無關。 快樂，其實係因，唔係果」「每一個經歷其實冇乜意義，意義係由自己去界定，但係一定比你想像中美好同重要，就算當時係幾惡啃都好，好好行自己嘅路就掂」而阿聰就是靠住一份毅力和堅持，終於走出了他人生的低谷，無抑鬱之餘仲好幸福快樂，且在演藝事業上考取到優異的成績，劇集和電影接唔停，讓太太可以安心放下工作全心照顧屋企。

最後阿聰就總結一下自己的心情話「好似我家吓睇番段片，發現原來果日唔係路障，而係加油站，令我選擇之後嘅路，決心尋找快樂同自在，亦係果日，令我更有勇氣去更多嘅頒獎禮，食更多嘅白果。所以你話，人生幾美好，根本就冇衰嘢」睇他現在咁豁達咁積極咁正面兼仲識鼓勵其他人，半夜三更都不忘發放正能量，就知他已經完全好返晒啦。

張繼聰facebook原文：

長文，隨便出入
無意中睇到依段片，好歡樂，唔係講七年前我個郁同髮型帶比大家嘅歡樂，而係.....
七年前嘅依一日，當時嘅我可以話係考緊宇宙俾我嘅試....啱啱出世嘅朋友仔可以去歷史博物館查吓我當時嘅外號，就會略知一二，當時我嘅花朵真係好猛
Anyways，當時我嘅抑鬱病非常嚴重，非常想又非常怕去依個Party 。想去，係因為太太當時成績非常出色，我一定要係現場支持佢同見証佢努力嘅成果，怕去，係因為我當時嘅成績非常冇乜成績.....
片中所見嘅我，其實當時食行藥，所以好口乾，好頭暈，好攰，個cam又起勢隊住隊住，同時又好感動，好替太太開心，好想抱住佢，再同時好驚好怕，好擔心食白果嘅我唔知又會比人點嘲笑，總之九萬幾個層次又li 又lu .....
同時台上嘅太太，成晚雖然得到好多個獎，其實當時嘅佢抑鬱病都好猛烈，承受好大嘅壓力，佢都係考緊宇宙俾佢嘅試....
你話世界係幾奧妙？快唔快樂，原來同得到幾多無關。 快樂，其實係因，唔係果
如果你咁得閒睇到嚟依到，朋友，我想講嘅係，每一個經歷其實冇乜意義，意義係由自己去界定，但係一定比你想像中美好同重要，就算當時係幾惡啃都好，好好行自己嘅路就掂
就好似我家吓睇番段片，發現原來果日唔係路障，而係加油站，令我選擇之後嘅路，決心尋找快樂同自在
亦係果日，令我更有勇氣去更多嘅頒獎禮，食更多嘅白果
所以你話，人生幾美好，根本就冇衰嘢