【爸爸去哪兒】吳尊女兒Neinei無公主病 冒險落山坡執南瓜
做父母都會想將最好嘅嘢留俾仔女，慢慢好容易令小朋友形成依賴，驕縱任性有公主病。來自汶萊嘅吳尊家境富裕，佢爸爸係當地嘅地產大亨，吳尊自己亦開設全汶萊最大型健身中心，NeiNei同Max喺咁優越嘅生活環境下成長，無變成任性嘅小公主小王子，喺《爸爸去哪兒5》中更表現得好有禮貌同教養。新一集中NeiNei為咗爸爸同弟弟嘅午餐，唔怕危險同污糟穿過籬巴爬落山坡，令網友讚不絕口。
《爸爸去哪兒5》幾位小朋友當中，年紀最大又最有經驗嘅就係吳尊囡囡NeiNei。2014年當時只有3歲半嘅NeiNei，已經參與《爸爸回來了》拍攝，呢次再回歸變成節目中嘅大姐姐。剛開始時因為Neinei比較不適應鄉村生活、飲食習慣，讓網友一度質疑是嬌嬌女，不過隨著節目進入中期，Neinei負責任性格越來越明顯，不時對幾個小朋友照顧有加，好似之前去火龍果園，會一力承擔做搬運工作，即使整傷手都無哭鬧繼續默默工作。
新一集中NeiNei接到新任務，要同小山竹上山搵食物俾大家做午餐，NeiNei一邊行一邊留意小山竹跟唔跟得上，遇到狗嘅時候雖然兩個人都好驚，但NeiNei都將內側位置讓俾小山竹，自己面對大黑犬。之後佢地搵到一個大南瓜，對小朋友來說實在太大太重，佢地一邊搬一邊多次停低休息，然後NeiNei諗到可以利用南瓜嘅外型慢慢滾落山。點知落梯級時南瓜失平衡碌咗出籬笆外嘅山坡。
NeiNei見到南瓜出意外，第一個反應就係擔心爸爸同弟弟無午餐食，望一望個籬笆，然後決定從籬笆及石級間嘅空隙穿到山坡，嚇得工作人員心驚膽跳連忘制止，不停叫NeiNei「上來」、「我幫妳去拿」，深怕佢一個不小心跌落山谷。不過NeiNei意志堅定表示自己OK，避開竹籬笆尖銳的地方，好勇敢地鑽過去，順利執番個南瓜後，再從同一個空隙爬番上石級，開開心心咁拎住南瓜返去搵爸爸。爬來爬去既唔怕污糟受傷，亦表現出好強嘅責任心，整跌南瓜堅持要自己去執番，NeiNei勇敢又果斷嘅表現，令網友大讚佢係「最沒有公主病的小公主！」