章子怡與湯唯爭相演古裝劇　金錢掛帥忘掉張藝謀長紅要訣　

繼周迅回歸電視劇之後，湯唯早前亦已落實接拍劇集《大明皇妃孫若微傳》，而另一位國際影后章子怡亦有傳將獻出第一次予《帝王業》，不過一直有指因為章子怡名氣過盛，搞到無男星肯同佢拍檔，不過，日前就有消息話胡歌已經答應演出，劇迷應該很高興。

時隔10年兼係首次拍攝古裝，到底《大明皇妃孫若微傳》吸引力何在？湯唯就話單係未拍過古網劇呢一點已經令佢好想入局。《孫若微傳》改編自蓮靜竹衣小說《六朝紀事》，講述了一代奇女子孫若薇放棄報仇，輔助皇太孫朱瞻基治理天下，並憑藉自身的聰慧才智，幾度救大明王朝於危難之中。既要由16歲演到70歲，又要學習明胡的歷史文化以及禮儀重重，對湯唯來說絕對係一大挑戰。男主角方面，則在《黃金時代》演出的朱亞文擔任，朱亞文雖然知名度一般，但都叫做參與過唔少好戲《建軍大業》、《山楂樹》，亦曾經憑劇集《北上廣不相信眼淚》得過華鼎最佳男主角，一啲都唔失禮。60集嘅《孫若微傳》預計需要半年多拍攝，並於2019年播放。

而80集長劇《帝王業》，則改編自寐語者小說《帝王業》，早前曾有消息指章子怡買下版權後繼而決定親自演出，而條件之一係一定要用老公汪峰嘅歌做主題曲……《帝王業》講述貴族出生的王儇（章子怡）本與皇子子澹青梅竹馬，但因權勢爭霸，令佢要改嫁出身寒門的蕭綦，但最後成為權傾天下嘅豫章王，二人展開一段先嫁後愛的婚姻。雖然張藝謀導演曾經叮囑過章子怡「不要接拍電視劇才是自己事業長紅的要訣」，但近年不少電影人走去拍電視劇，相信最大原因都係因為錢，就以章子怡為例，有傳佢係以2億人民幣接下《帝王業》，而男主角胡歌亦都唔輸蝕，收1.5億人民幣，雖然拍攝時間長達1年，但無論係片酬定入屋度都遠勝電影。雖然廣電總局去年有意打壓天價片酬，但似乎唔多work。而早年曾有傳湯唯以每集25萬人仔獲力邀加盟《武則天》，惜最終未能成事，不過，若然成事的話，都係2千萬片酬左右，比起楊冪、趙麗穎等人片酬，似乎相距甚遠，更莫講話同國際巨星章子怡比。