【MXM澳門演唱會】煐岷爆準備緊新碟 東賢約定拖粉絲行skywalk

韓國男子組合MXM一個月前先嚟完香港舉行完首個海外演出，同粉絲一齊開咗個出道大勢Party。當時林煐岷同金東賢出道都未夠一個月，就已經吸引一眾韓國、日本、中國同香港粉絲為MXM撐場！

而時隔一個月後，尋日（28日）MXM再度火速會見港澳粉絲，喺澳門百老匯舞台舉行首個澳門Fan Meeting，仲有同粉絲大玩遊戲、又送簽名Poster同專輯、仲有同中獎粉絲合照，最後仲同粉絲Hi touch近距離接觸，一眾粉絲今晚應該開心到瞓唔着覺！

Fan Meeting中，MXM先帶嚟《Welcome to My Hollywood》再同粉絲傾下計，當問到MXM對澳門印象係點時，煐岷就表示：「知道澳門夜景好靚又有好多美食，想試下牛肉麵同燉奶。」而東賢就話：「想去澳門塔行Skywalk！」主持知道東賢咁大膽就問佢會唔會玩笨豬跳，點知東賢真係大膽到即場答夠膽玩，仲話約定粉絲手拖手行skywalk添！其後，煐岷都有提到依家努力緊準備新專輯，希望可以喺最短時間內再同大家見面，又叫大家記得等佢哋啊！東賢仲預告今次專輯係有新面貌同新風格㗎，粉絲們要密切留意喇！

我們01韓迷的facebook專頁Kpop 01已經開始喇！想知道更多韓國娛樂、飲食、玩樂、時尚資訊，快點去給like吧：https://www.facebook.com/hk01.kpop/