【後生仔傾吓偈】藥房太子爺係兵？　麥明詩自爆：40歲未嫁會娶我

今集《後生仔傾吓偈》主題就講男女之間係咪有純友誼，由麥明詩、馮盈盈、陸浩明同一班大學生一齊玩「大冒險」，揀三個朋友Whatsapp佢問：「你覺得我哋之間係咪得純友誼？」，而最近緋聞多多嘅麥明詩就被抽中，佢要係電話度揀3個朋友send呢個曖昧訊息，馮盈盈見麥明詩拿不下主意，就幫佢揀咗坤哥，仲抽水講話：「諗緊使唔使揀林作啫！」，真係氣氛尷尬到震。大家就提議佢揀身邊的好朋友，但麥明詩就好擔心朋友誤會：「我搞到人哋以為有希望咁點算？我friend親通常都係對我有意思，um……，我一廂情願覺得係咁囉。」不愧係港姐冠軍，真係對自己特別有信心！

麥明詩之後又大談自己嘅感情觀，「我覺得細個比較重感情，你好需要嗰一刻嘅衝動，但大嗰之後揀男朋友會理性好多，你會考慮一啲客觀條件，例如我哋性格夾唔夾，有時就算唔係好有熱情，但長遠作為伴侶係適合嘅，都會選擇接受。」麥明詩形容結婚對象係要你唔介意同佢一直共渡幾十年嘅好朋友，在乎大家舒服又融洽嘅相處。

節目到最尾終於公佈麥明詩3位好友對佢曖昧訊息嘅回覆，第一個就係坤哥，佢話：「OH, YES，We are friend and 同事 so唔係純友誼囉，Or you just treat me as同事 咁就友誼又沒啦 」覆得咁玄妙，坤哥果然係情場老手！而第二個就係同麥明詩一齊拍《使徒行者2》嘅楊潮凱，佢就話：「我唔想囉！」但楊潮凱結咗婚架喎，今個月頭仲宣佈有BB，唔通佢知道麥明詩係玩佢？

最後一個就係之前同麥明詩傳過緋聞嘅大藥房太子爺Thomas Chong，佢個回覆係：「Yes, don’t tell me you are suddenly in love with me.」麥明詩解釋自己同Thomas係冇嘢，大家嘅關係只係兄弟：「係我大學同學，基本上我同佢嘅關係就好似兄弟，我哋絕對係冇嘢，喺我角度係咁諗。」原來呢位Thomas係麥明詩嘅「大仁哥」，兩個人相約只要麥明詩40歲仲係未結婚就會娶佢，真係相當Sweet！之後麥明詩怕自己嫁唔出爆料話自己仲搵咗另外一個朋友，約定佢38歲前仲未嫁就會娶佢，實行「雙重保險」！