古天樂舊手機用足8年 用推蓋電話唔想換：係幾美好嘅回憶
撰文：郭敏玲
出版：更新：
近日被封為「最長情」的藝人一定是古天樂，因為有網友發現他仲用緊8年前出產推蓋手機。而古天樂晚上就以一身型格全黑冬季裝兼帶上黑超現身手袋專門店開幕禮，完全符合他Mr.cool的形象！當被問到仲用緊推蓋手機一事時，古仔笑言自己係好念舊嘅人，「我係用開就會一直用嘅人，肯定無選擇恐懼症。」
古仔透露推蓋手機是由推出就開始用到現在，因為變左習慣所以就唔想換，「我覺得都係幾美好嘅回憶黎嘅，雖然我都有用智能電話，因為而家科技發達，我都要有用智能電話去睇下email睇新聞。」今日帶上黑超現身活動的古仔，原來並不是扮有型，而是因為眼睛受傷，「隻眼受傷係因為前日拍戲拍一個動作場口，唔小心用兵器打到自己，而家眼白有部分裂開左，今朝縫左8針。」他表示昨晚立即乘坐專機回港睇眼科醫生，幸好沒有大礙，「醫生check過視網膜無事，裂開嘅地方去晒啲血要3-4個星期。」問到會否需要特別請假養傷？出名敬業的古仔就話，「儘量做到嘅工作都去做，同埋要睇工作環境，因為好容易感染。」
古仔都好感激劇組俾自己放幾日假養傷，提到上星期要在工作中度過47歲生日，會否趁今次放假順便慶祝埋生日？古仔就咁講，「唔洗喇，我覺得而家儘量睇下可唔可以安排好工作先。」