【星和無綫電視大獎】王浩信蔡思貝隔2個身位 訪問完即閃人避嫌
撰文：李妍樺
出版：更新：
由新加坡的「星和視界（StarHub TV）」和無綫電視（TVB）合辦的《星和無綫電視大獎2017》今晚7點半舉行，由上個禮拜開始，網上面已經流出好多疑似得獎名單，大家嘅心水名單都係圍繞住王浩信，皆因佢套《不懂撒嬌的女人》同《踩過界》紅到不得了，呼聲相當大，如果今次喺星和先拔頭籌拎咗視帝嘅話，相信之後嘅萬千星輝頒獎禮都應該拎硬喇，不過唔知最近王浩信同蔡思貝嘅花邊新聞會唔會影響浩信拎獎呢？
當地五點半一眾藝人就就開始準備行地毯，司儀介紹今年重頭劇《踩過界》時，蔡思貝同張振朗一齊走上台，咦，王浩信呢？明明蔡思貝同張振朗先係主角喎，似乎王浩信為咗避嫌就決定唔一齊出現，之後蔡思貝話：「這部劇到現在為止，是最最最難忘的一部劇，因為還有好的拍檔，Ali、Vincent，我們是非常好的一個Team！」
終於後台訪問有主持人撈到《踩過界》一眾演員，蔡思貝、張振朗、朱千雪、李佳芯同王浩信5個人都係齊到，3位女演員嘅衣著好似約埋咁，同樣都係著低胸晚裝，相當有睇頭！問到王浩信對今次頒獎禮有咩期望，佢就話：「希望個個都可以拎獎，《踩過界》可以攞最佳劇集獎，希望我哋呢度出現到情侶獎，希望我哋呢度囊括到多過5個獎啦！」訪問中間明確見浩信與蔡思貝故意保持距離，足足有成2個身位，之後當主持人講到女演們嘅衣著時，佢仲借啲意閃人，識得避嫌咁咪好囉，唔駛老婆Yoyo（陳自瑤）擔心嘛。
+5