【爸爸去哪兒】陳小春一拖五湊細路　錫小泡芙錫出面Jasper都冇份

陳小春喺《爸爸去哪兒》裡面是出名嘅惡Daddy，囝囝Jasper成日都被佢鬧到暈，就算經媽媽應采兒調教完之後，態度雖然有改善，但做開山雞哥嘅陳小春好有氣場，其他爸爸見到佢都要叫聲春哥。陳小春係表面惡啫，其實個心係好錫囝囝，正宗口硬口軟，把口就成日呼喝Jasper：「快點快點！」Jasper成日聽到都嚇到面青青，但有咩事都會第一個衝出嚟幫Jasper。當大家都以為陳小春對Jasper咁惡係因為佢唔識表達愛，咁你就大錯特錯喇！

陳小春由一節目開始已經大讚第三集劉畊宏個囡小泡芙好可愛，第3集嗰陣已經開到口話想要好似小泡芙咁樣嘅囡，每次陳小春對住小泡芙完全變咗個人，由兇狠惡爸變成溫柔暖爸，集集都花式錫小泡芙，完全未見過佢用咁Sweet嘅一面對Jasper。好似今集咁，一班小朋友嘅任務要摘火龍果，戴手套嘅時候嗯哼就叫小春幫佢戴，小春一邊幫佢戴一邊話佢：「戴手套都不會！」，最尾仲冇理嗯哼戴唔戴到，而小泡芙只係舉起咗隻手，小春就主動行去幫佢戴手套，真係體貼到不得了。之後小朋友落田摘火龍果，Jasper同嗯哼都向小春求救話個籃太重，但陳小春只係敷衍幾句叫佢哋自己拎慢慢行，但相反小泡芙只係講咗句「好沉」，陳小春即刻話：「我背！」，仲同一對一教學小泡芙點摘火龍果，真係親生囝Jasper都冇咁好嘅待遇！

大家可以睇吓，陳小春對小泡芙完全係溺寵！