Bob 請靚女大搞司儀生意：諗過上市做大間公司

近幾年林盛斌（阿Bob）「撈到風生水起」已是人盡皆知的事，又開公司又買樓。知名程度，就算街市菜檔「靚姐」唔記得佢叫咩名，都會認得佢個樣。如果你有追蹤這位「另類巨星」的facebook的話，應該不難發現他在facebook上分享了一位身穿泳衣的美女照。「自從簽咗佢返嚟之後，已經有幾位男同事好主動咁，要求調部門做藝人管理嘅工作...」連吳業坤（坤哥）也留言說：「我轉行okay？」

其實相中人叫做Sarika Choy（蔡宛珊），樣靚身才好之餘其實更是中印混血司儀芾兼模特兒，還精通英語，廣東話以及普通話。而Sarika更是Bob在2016年簽約的旗下司儀之一。Bob接受《香港01》訪問時說：「Sarika（蔡宛珊）係我第一個簽返嚟嘅司儀。其實我識佢嘅時候係十幾年前，佢做model我做DJ。嗰陣我哋一齊拍咗個啤酒廣告，佢又係第一次，我又係第一次拍電視廣告。雖然中間我哋冇咩接觸，純粹係show入面或者公開場合見到。」原來他們之間是相識於微時，之但係點解阿Bob要簽約Sarika（蔡宛珊）呢，又係另一個原因啦。

阿Bob至幾年前人氣急升之後，可謂是「接job接到停唔到手」，出show做司儀的價錢又接近6位數。正所謂「肥水不流別人田」，所以阿Bob亦都有意大搞。「Sarika其實只係我第一個簽返嚟。遲啲都會打算簽多幾個唔同類型嘅司儀，例如有啲專講普通話，又或者簽多個男司儀返嚟。不過都希望等公司再多啲資源嘅時候再簽多幾個。」阿Bob更透露說：「未來方向我有諗過上市做大間公司。因為宜家公司成立3年幾以來都做咗好多大小公司嘅設計制作。托賴生意都唔錯，例如之前都幫一間國際性遊輪公司設計佢哋公司嘅制服同logo。公司仲會拍客戶拍下網片宣傳咁。」

訪問中阿Bob更大讚公司這位「新同事」Sarika。「其實之前已經試過同Sarika拍檔過幾次。發覺佢主持功力好好，夠專業，經驗又好夠，執生能力亦都非常好。咁啱嗰時公司想簽多個司儀返嚟，所以我就搵佢一齊合作。簽咗返嚟之後，公司同事又幫佢拍咗一啲教人講英文嘅網片，其實口脾都唔錯。簽咗佢呢一年幾佢又多咗好多生意工作。當然佢個樣標緻，身材又好啦，我諗好多網友都會鍾意佢。」

但係，阿Bob讚到呢位「Bob 女郎」咁好，唔知林太會唔會呷醋呢？