【港女講感情】作為彭于晏忠實粉絲　寧願蝕畀男人都唔想輸畀女人

今朝一起身唔知大家有冇睇一單新聞，唔係落咗3號波大家要返工，而係傳彭于晏出櫃！對象係170億台幣的富商，仲要有圖有真相咁話，有人喺微博爆料話呢個好有錢嘅台灣富商已經同彭于晏瞓過覺，仲話北京好多人都知，咩話？乜之前唔係傳緊同張鈞甯熱戀中，仲私底下約埋一齊去睇戲，咁快就換咗畫？仲要連個對象嘅性別都換埋，咁大嘅資訊量太多，唔知各位彭太頂唔頂得住。

大家都諗緊究竟係應該鬧爆呢個台灣富商，點可以用錢嚟買晏晏嘅肉體，定係尊重同性平權，對彭于晏的性取向表示支持，話晒依家都好多國家都立法批准同性結婚，享受應有權利。個心十五十六嘅時候，彭于晏工作室拿拿臨澄清：「純屬捏造，謠言止於智者，已經交給律師在處理。」各位彭太心入面都唔知講咗幾多句：「希望係假！」，雖然講就咁講啫，但聽講靚仔嘅通常都係Gay架喎，咁靚仔、又練到咁大隻、又咁少緋聞、又冇女朋友……聽落都有啲唔對路，定係，定係其實個富商先係煙幕啊？

淨係諗起彭于晏隻手拖住唔係自己隻手，諗起都覺得難受，有咩可能？唔通靚仔只配同靚仔一齊？唉，由《愛情白皮書》嗰陣已經留意到佢，皮膚白白，對眼又大，仲要生得高大威猛，如果100分係滿分，晏晏最少值200分啦。但，或者咁諗，如果彭于晏真係鍾意男仔嘅，都唔係最壞嘅事，最少各位姊妹並冇輸到，並唔係大家條件唔夠好，唔夠溫柔體貼大方得體，而係晏晏唔鍾意女人！輸畀男人總好過輸畀女人，因為佢最少喺某程度上仲係單身，都仲係冇女朋友啊…..