【親愛的客棧】陳翔失戀做電燈膽　望實兩對情侶拍拖超無奈

繼《中餐廳》後，湖南衛視再推出經營真人騷《親愛的客棧》，節目請咗兩對CP劉濤與王珂、闞清子與紀凌塵，加陳翔做固定嘉賓，一齊去到少數民族地區，親身體驗點樣經營一間客棧。

驟眼睇《親愛的客棧》的嘉賓名單，有網民就話點解製作單位咁狠心，特登請一個啱啱失戀的男子去做電燈膽？大家都知道劉濤同老公王珂結婚十年，貴為國民人妻，日常生活非常恩愛，而闞清子同紀凌塵就係熱戀情侶，經常互耍花槍。陳翔單身寡佬，要抵擋住兩對情侶浪接浪的攻擊，可能要出家成僧先可以頂得順，唔係漫長的廿日實會發癲。

其實早前陳翔宣布同拍拖2年的毛曉彤分手，佢係微博指「是我沒有保護好曉彤，讓她在這段感情裡受到了諸多傷害，萬分歉意。」不過網上瘋傳佢地分手的原因係因為陳翔出軌，被女友抓姦在床，仲傳出小三係女星江鎧同，一度登上微博搜尋榜。

終於係新一集的預告片發現，陳翔終於忍唔住爆喊，片段中佢默默係王珂前面流淚，王珂亦好關心咁攬實佢，抱住佢頭安慰話：「沒什麼大不了的！」雖然畫面基情四起，但陳翔被爆與女友分手，情傷未好就要孤身面對兩對情侶瘋狂的攻勢，固中滋味的確唔好受，如今終於肯開公面對，的確需要好大的勇氣，希望陳翔快啲從失戀中康復，重新投入工作。