《都市蜜遊》鄭俊英自爆係花錢狂？ 去旅行一定要帶埋「她」！
當韓國oppa遇上「港女」，應該好有火花噃！早前韓國音樂才子鄭俊英參演tvN原創旅遊節目《都市蜜遊》，就搵埋3位香港女神黃心穎、雨僑同倪晨曦拍攝，分別去到倫敦、釜山同四國旅行，剛剛過去嘅星期二，呢位音樂才子就嚟到香港宣傳《都市蜜遊》，仲抽空同我哋《香港01》做咗個小訪問添！
攝影：梁碧玲
講到同朋友去旅行，最擔心嘅事情都莫過於「炒大鑊」，大家可能都會有「去完旅行變仇人」嘅經驗，不過鄭俊英今次就好好彩，今次《都市蜜遊》同行嘅3位女星黃心穎、雨僑同倪晨曦，似乎都係完美旅伴！鄭俊英大讚呢幾趟旅程好新鮮：「喺韓國同韓國演員一齊去旅行嘅節目其實不多，我係第一次同女仔拍呢種節目，而其中更係同香港演員一齊，所以好新鮮亦都好喜歡，3位做我旅伴真係好好，因為佢哋都好聽對方意見，亦都好有熱情、好有energy，去邊個國家都唔會悶！」鄭俊英仲話自己揀旅伴嘅條件係：「當然係同女仔去啦！」睇嚟今次黃心穎、雨僑同倪晨曦3位旅伴都完美符合鄭俊英嘅條件！
鄭俊英出道4周年來香港 《都市蜜遊》對黃心穎Elva變playboy？
今次《都市蜜遊》遊覽倫敦、釜山、四國嘅行程中，鄭俊英同黃心穎、雨僑同倪晨曦十足甜蜜情侶一樣，甚至彈結他對佢哋唱歌，真係好浪漫！不過鄭俊英就講到旅行背後嘅「真相」：「因為係浪漫嘅旅行，明明很熱，但就要扮唔熱，去日本時嘅天氣都係超熱！」而且鄭俊英喺《都市蜜遊》入面要用有限金錢計劃行程，真係一啲都唔簡單！鄭俊英話：「喺有限金錢之下，最難嘅係交通，飲食之類都可以求其解決，但為咗要搭飛機，其他地方都要花費少一啲。」
可能係因為經歷咗《都市蜜遊》呢3次「有限金錢」嘅旅行，問到鄭俊英有冇旅遊建議送俾大家時，佢笑住話：「旅遊建議？唔係亂花錢就可以喇咩？」經常周遊列國嘅佢，又話出門必定要帶住一條鍊：「去旅行的話可能會唔見嘢，要帶一帶可以將包包扣喺自己身上嘅鍊。」同鄭俊英相比，一齊去釜山嘅雨僑嘅旅行裝備就講究得多，好用心經營社交平台嘅雨僑話一定要帶相機，仲要唔止一部！雨僑話：「連鏡頭都可能帶好幾個，仲有各種唔同嘅拍攝燈，反正日常用品通常喺酒店附近都買得到，基本上行李都盡量簡便，騰出空位帶拍攝工具。」
其實早前香港歌手周柏豪同韓國女星Clara（李成敏）都已經拍過《都市蜜遊》，仲嚟到香港取景添！不過鄭俊英同雨僑就不約而同話冇特別參考，因為希望拍出自己style嘅旅程，雨僑仲話：「我出發前主要係蒐集釜山嘅資料，當然都希望了解對手鄭俊英嘅喜好，好在佢都係歌手出身，用音樂作為共通語言應該冇問題！」難怪兩位去釡山拍攝嘅時候咁有火花！
更多鄭俊英圖片及《都市蜜遊》花絮照：
我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/