九把刀疑似求婚成功　小三周亭羽變正印

作家、導演九把刀喺事業上就好成功，但感情路上，佢嘅經歷幾乎可以出本小說。2014年時，佢被影到同中視主播周亭羽出入時鐘酒店，雖然當時九把刀已經有交往10年嘅女友小內，但佢開記者會時就話：「不只周亭羽也愛小內。」之後更寫下千字懺悔文，內容除表達對女友抱歉之外，亦流露出對小三嘅舊情難捨，結果引發網友瘋狂砲轟。

Life must go on，九把刀最後選擇同10年女友修補感情，又出國旅遊，但半年後，九把刀宣布回復單身，同佢看似已經無關係嘅周亭羽，轉頭被影到一齊打捧球，更火速承認「交往中」，好似已經唔記得咗自己曾講過「雙方是沒有未來的」。

愛得深又愛得真嘅兩人，日前就傳出婚訊，有指九把刀喺周亭羽媽媽見證下，跪地求婚，並獲女友含淚答應。雖然係開心事，但二人得到嘅抨擊大於祝福，更有網友指二人劈腿價值觀差不多，都算「登對」。