李天翔同拍拖6年女友結婚 認字特警好感恩：好多嘢要靠老婆處理
撰文：李妍樺
出版：更新：
「認字特警」李天翔今日正式簽紙成為人夫，但他並沒有鋪張大搞婚禮，只是簡單跟家人吃飯慶祝，相當低調，好兄弟鄭世豪亦當然有份坐主家席。李天翔一臉幸福大曬手上的戒指，不是只有女生才愛炫耀婚戒嗎？他說：「我真係好鍾意戴戒指，隻戒指我一個月前已經訂咗，好靚好鍾意，我唔會怕整唔見，當然做嘢可能會除，我會好好保管。」
李天翔跟太太相愛6年，之前一直都是同居的狀態，在他心裏就跟結了婚沒兩樣，但身邊朋友一個一個拉埋天窗，他察覺到身邊的太太也有走進人生另一階段的想法，他說：「女仔話唔想結婚就假嘅，我覺得6年都差唔多係時候喇，求婚之後感覺都唔係好大，到上律師樓預約簽紙時我先覺得有唔同，離開之後我好開心可以同人哋介紹佢係我未婚妻，個感覺真係唔識點形容！」
「其實我未結婚已經有叫佢老婆，不過佢唔叫我老公之嘛，簽咗紙之後嘅感覺好唔同，雖然之前已經係同居。」言談之間李天翔不時緊握手中的戒指，他自言是個笨拙的人，生活瑣碎事都靠老婆打理：「你咪睇我個樣好似好精咁，其實我好蠢，好多嘢都要靠老婆處理。」
婚後李天翔並未有置業的打算，歸因香港樓價連做藝人也負擔不起，他嘆氣道：「邊有錢，香港買樓咁貴，邊畀得起首期，會唔會買樓要同老婆商量吓，我哋依家係租樓，但租都好貴。」在香港生小孩也得考慮荷包夠不夠厚，李天翔暫時未有這個打算：「我同太太都冇咩耐性，冇諗過生，暫時未囉，香港養小朋友好貴，要學好多嘢去補習，駛好多錢，好開心屋企人都冇畀壓力我哋。」