貓店主波子吊鹽水留院 袁文傑嬲到震：CCTV証實無接觸何來襲擊？
平時經過唔少屋邨地舖，都會見到有養貓看門口，最近觀塘安達邨一間藥房貓店長「波子」，被內地婦投訴抓傷其兒子的耳背，報警並向漁農自然護理署投訴後，波子被漁護署「預約拘捕」，惹起廣大網民不滿，不足一日已超過6萬人聯署，要求漁護署停止無理拘捕。本身有飼養貓隻嘅袁文傑都有留意呢件事，接受香港01訪問時更氣憤難平話：「宜家係咪好得閒先﹗」
事發於6號早上，一名內地婦人帶同兒子到藥房購物，至中午重返藥房，指其子被「店長貓」波子抓傷耳背，翻睇藥房閉路電視，並無發現波子攻擊該小孩的過程，婦人卻堅持報警將兒子送院，並於翌日帶同漁護署人員到場欲捉走「波子」，不過主人表示事發後已將「波子」帶回家中，並透露「波子」連日來因不肯吃喝，體重減少、情緒不穩，目前在私家獸醫診所留醫，正吊鹽水留院觀察。
本身養貓逾6年嘅袁文傑，表示對事件非常反感：「一隻好得意嘅貓或動物放喺店面，有人想同佢玩好難避免，但係實事求事，翻查閉路電視已經証實無(整傷小朋友)呀嗎，何來襲擊？既然呢件事唔成立點解仲要攪咁多嘢，宜家係咪好得閒先？好得閒應該派人駐郊野公園，捕住虐待動物嘅人拉佢地番嚟，宜家就係知隻貓喺藥房，好簡單上門捉就得，呢啲係好無能嘅表現。為做而做浪費時間，捉隻貓番去會幫佢咩？睇下佢有無抑鬱？」
「你喺街撩流浪狗都會以為想襲擊而吠你，貓其實係一樣，有無人知道小朋友對隻貓做過d咩？可能貪得意哄埋隻貓度以為被攻擊，咁呢d係自衛嚟喎，自衛無罪㗎噃﹗引起咁多輿論，大家應該認真睇下部門處理事情，到底用緊咩標準。香港經常發生好多虐待貓狗甚至虐殺新聞，有無法例可以保護佢地？有無盡力去拉人？貓狗慘死，非法繁殖場政府有無盡力去幫佢地？呢d事相關部門應該做又唔去做，宜家係知道隻貓喺藥房，佢走唔到就要人交出嚟，咪欺凌弱小囉。」
漁護署發言人回應，重申根據《狂犬病條例》（第421章），一般情況下，該署會將涉事動物帶往動物管理中心觀察7天，如確定動物沒有狂犬病等問題，將會發還動物予主人。而波子現時身體狀況欠佳，暫住私家獸醫診所留醫，該署會密切留意有關情況。