【使徒行者2】袁偉豪唔做臥底行古惑？　兩個原因令佢心態有轉變

《使徒行者2》不經不覺已經播了一半，劇情亦開始進入直路，在上一集，卓Sir（苗僑偉）和梅姐（黃翠如）終於發現徐天堂（袁偉豪）原來都係臥底。不過去到最尾，就俾佢哋見到天堂喺黎Sir（張兆輝）墳前燒掉自己的警員委任證，他們十分驚訝天堂這個行為。其實卓Sir一直都信唔過天堂，所以先會偷偷地跟蹤佢，從而發現佢呢個舉動。

繼續落會有小量劇透，逃生門在此。

咁究竟徐天堂係咪真係臥底變節呢？在今晚這一集中，佢兩個就懷疑佢真係變咗節，因為天堂在樂少（周柏豪）面前殺死譚經理（湯俊明），所以他們踩上天堂屋企講數。當然一個醒目仔就唔會咁易被人識穿，原來天堂殺譚經理只係一個假象，佢成功幫經理著草，之後仲拎本數薄出嚟，話自己做咗臥底之後一直都有記得收過嘅錢，證明自己無變節。

雖然天堂做臥底之後，日日都花天酒地，似足古惑仔，不過這些舉動都只係掩飾他是臥底，而燒委任證相信都只是一時之氣，因為佢原來已經不是第一次被警隊遺棄。他在混入長興之前，其實都已經做過臥底，仲成功拉埋人，返去做警察，可惜因為跟同事唔夾而離開警隊，係黎Sir召喚佢繼續做臥底，所以今次黎Sir死咗對佢打擊都相當大。在之後他聽到梅姐講卓Sir和五個泰國臥底被炸死的故事，先明白到原來卓Sir係真心幫佢，所以就決定繼續做臥底。