【中國新歌聲】陳奕迅爆節目內幕：導演叫我同那英按一下
近年內地綜藝節目大受歡迎，重本投資拍攝真人騷及各項比賽，不過好多時節目過份戲劇化，現場觀眾投入度太高，都令大家不禁懷疑，其實呢類節目係咪戲一樣照劇本做呢？陳奕迅日前上本港節目就大爆《中國新歌聲2》內幕，原來導演真係會經過耳機向佢哋下指令！Eason喺節目中望住經理人問：「我地合約有無寫唔講得呀？」
Eason擔任ViuTV新節目《吹臣》嘉賓，面對陶傑、卓韻芝、鄒凱光等8位主持，一人一句大逼供。節目一開始就問Eason，點解加盟內地節目《中國新歌聲2》擔任導師，佢話其實從第一季起製作組就不斷邀請，剛好今年無安排巡迴演唱會有空檔：「覺得好似幾好玩，聽過咁多話黑幕嘅傳聞，我又好想入去睇下有幾黑，到底有無呢啲野，睇完我就真係唔覺有。不過……」
Eason不斷話自己唔覺得有黑幕，但下一句開始就有內幕爆：「初選時有個學員唱得OK嘅唔錯，但係就未至於令我按下轉身（評分按鈕），導演見我有啲反應事後問我覺得點……隔咗兩次錄影，突然把聲有啲熟嘅？(再嚟過呀？一個人可以上兩次咩？)我都懷疑，究竟點解佢會又出現，仲要同一套衫。」乜同一季同一個比賽，可以無限復活咩？
「我聽得出係同一個人，但我唔知其他三個導師有無聽到，劉歡呢次有按轉身，我就同第一次聽同樣感覺，然後導演喺耳機叫我同那英「按一下按一下」，我估佢係想有啲戲劇性。我有問導演係咪識啊？點解俾多一次機會佢？導演就話唔係，不過見第一次我地四個都有啲反應，所以想俾多次機會呢位參賽者。」根據Eason喺節目中嘅提示，呢個學員應該係初選唱《浪人情歌》，被劉歡揀中入隊嘅張婉清。
至於內地比賽必備嘅「超搶鏡觀眾反應」到底點嚟呢？陳奕迅接講：「我呢個節目嘅觀眾好少喊，應該似係另一個多啲。觀眾其實好慘，嗰啲現場觀眾其實得一個飯盒，嗰度有個台灣FM（錄影指導）輝哥真係好正好勵志，即使錄影到凌晨兩點都好HIGH咁帶動氣氛，你知啦台灣人有呢啲特質，大家錄到好攰見到佢咁都會繼續俾反應啦。」