【爸爸去哪兒】鎮宇囝囝Feynman仔大十八變　唔見3年變咗軒軒

第五季《爸爸去哪兒》全城紅播，當大家見到陳小春同Jasper互動的時候，望到小春呼呼喝喝Jasper，會唔會諗起第二季的吳鎮宇和Feynman？前排吳鎮宇帶埋仔仔上大陸節目《大片起來嗨》，一登場就發現Feynman的靚仔樣大不如前，身形發福不少，臉仔多咗少少肉，不過仍然保持到可愛的電眼。

大家仲記唔記得Feynman當年參加節目的時候，講嘢比較少，通常用行動去表達自己的心情，係當季咁多個小孩中，個性較為突出的一個。佢憑着少言寡語，但成日做啲好溫馨的事，惹來大班「姐姐粉」、「阿姨粉」憐愛，加上當季Feynman的外貌較為出眾，更吸引到一班後生妹喜歡，絕對是星級寶寶。

當季的節目中，吳鎮宇照顧Feynman的方法猶如小春對Jasper，都係一睇唔過眼就會話，例如見到Feynman行慢少少就鬧，跌嘢又鬧，但Feynman就冇Jasper咁大膽，唔敢反駁鎮宇，所以Feynman通常一被佢鬧就會爆喊，而鎮宇亦冇好似小春對仔仔有態度的轉變，全季節目都係以嚴父姿態示人，搞到Feynman由頭到尾都好怕鎮宇。

不過最近吳鎮宇帶埋Feynman上《大片起來嗨》，發現二人的關係已經大大緩和，Feynman由從以前很怕爸爸，不知不覺變成朋友，會用平等的方式交流。節目裏見到Feynman雖然發福不少，外表有啲走樣，但是性格就好咗好多，例如鎮宇係節目度話：「自己咁靚仔，點解會生咗個唔似自己的仔仔？」但Feynman冇嬲之餘，仲追住鎮宇打全場，當鎮宇問：「你知道我點解唔敢打你？」Feynman竟然話：「因為中國人不打中國人。」全程非常搞笑。雖然Feynman有啲走樣，但是佢依舊靈動可愛，相信長大之後，只要努力運動，仍然是個小帥哥。