【降魔的番外篇】楊潮凱入行8年首次擔正：見到張海報勁感動

由馬國明及黃智雯主演的TVB台慶劇《降魔的》將接棒《使徒行者2》，於10月底播出，而大台首部與劇集互相呼應嘅網劇《降魔的番外篇—首部曲》亦已準備就緒。《番外篇》全劇由SeeSeeTVB製作，雖然每集只得8分鐘（全劇12集），但拍攝時間長達3個多月，而工作人員數量更同正劇有得比，製作費一點也不輸蝕，可見其重視程度。

《番外篇》講述的士司機左治（楊潮凱飾）與發明家古尼（黃建東飾）成立了「降魔的士事務所」，一心拯救地球，過程中，先後遇上了懂得瞬間轉移的失憶少女羅蒂（鄧佩儀飾）以及雪狐妖（許家傑飾），以為擊退雪狐妖就可以世界和平，怎知又有終極BOSS──魔界女王（張曦雯飾）出現。雖然同《降魔的》一樣都係圍繞識降魔嘅的士佬，但兩片在製作、拍攝風格、甚至係宣傳策略都幾唔同。《番外篇》運用大量CG、特技化妝，以及特別設計嘅捉妖道具；選角方面，還特意搵從未做過主角嚟楊潮凱、黃建東、鄧佩儀等。

正劇《降魔的》海報日前終於曝光，不過就同動畫片《頭文字D》有八成相似，再望望《番外篇》張充滿手繪感覺嘅海報，成件事差好遠。網劇用心程度簡得一讚之餘，亦有別於過往大台起用真人拍攝海報嘅做法，大大提升觀眾期待度。問到主角楊潮凱對於自己企正中間位有什麼感覺，他表示：「嘩！第一眼見到張poster真係好感動，因為之前劇組send給我那張係好多人，又放唔大，呢張係最清晰，感動係因為自己入行咁多年，終於叫做第一次做男主角，真係好多謝製作團隊，佢哋係好用心咁去完成呢事件，亦都搵咗好多人去幫忙。」他更笑言要會把海報派街坊以及用相架框起，放在家中當眼位置，可見其興奮程度。