陳喬恩天價嚇走劇組？　新劇《獨孤皇后》再拍陳曉做埋出品人

偶像劇出身的陳喬恩，其作品《王子變青蛙》、《命中注定我愛你》除打破台灣收視之外，更令她得到「偶像劇天后」稱號。而早於09年轉攻大陸市場的她，亦似乎無往而不利，單憑《笑傲江湖》東方不敗一角，已為她贏盡口碑。

而在短短幾年間，陳喬恩更連出品人都撈埋，去年一部《放棄我抓緊我》，今年一部《獨孤皇后》，前者因為拍攝期間，多次同男主角王凱傳出緋聞而令收視節節上升，而後者已完成拍攝，由於係陳喬恩同陳曉繼《王的女人》同《笑傲江湖》後，再次合作，加上陳喬恩已經4年多未有拍古裝劇，所以劇組都一致睇好《獨》。該劇描述皇后獨孤伽羅充滿傳奇的一生，並由陳曉扮演「隋文帝」。

而剛公布的「2017福布斯中國名人榜」當中，陳喬恩排第51名，年收入達8,500萬元人民幣。比起佢初到大陸發展時，以7萬一集接拍《佳期如夢》，簡直係天與地之差距。不過，日前網上消息指有製作公司準備年底開拍古裝劇《風流逐仙之斬仙訣》，原定搵陳喬恩做主角，但因為其叫價高達4千萬令有關方面卻步。聽落好似獅子開大口，但有傳楊冪、孫儷每集收60萬人仔，以50集長劇計的話，都要3千萬。其實，大陸廣電總局去年就已經發出「限薪令」，要求限制每齣戲嘅演員酬勞比例，更點名霍建華同周迅以億起跳嘅片酬，但似乎無阻演員收天價趨勢，如今又傳出陳喬恩因片酬遭換角之說，更顯得限薪令零作用。