【拉斯維加斯槍擊】古巨基身在案發附近勁慌亂：好多人嗌shooting
生死一線間講就容易，但親身經歷過先會知幾咁無助。美國拉斯維加斯Route 91 Harvest鄉謠音樂節發生的槍擊慘劇，一名槍手在酒店房向觀眾亂槍掃射，事件至今造成至少58死、500多人受傷。事發時古巨基同太太正身處槍擊案附近，佢接受商台節目《在晴朗的一天出發》訪問憶述經過時，仍然猶有餘悸。
今日（3日）陳志雲於節目中，致電身在拉斯維加斯嘅古巨基，他說：「早一晚我喺三藩市演出，第二日中午就同太太以及兩位朋友一齊去到Las Vegas。咁啱入住嘅酒店就喺事發地點隔兩間，事發時我地從室內通道返緊自己酒店，突然有好多人衝入嚟，情況好混亂，聽到好多人大嗌有shooting（槍擊），我地4個人就躲在賭檯下面，當時好慌亂，完全唔知係邊度出事，見到好多人走避，以為喺我地身處嘅地方發生。」基仔憶述時就好似回到事發時，把聲都顯得有啲震，明顯感受到佢嘅恐慌同無助。
「陸續見到有人企起身，覺得躲在賭檯下亦不大安全，開始陸續走，之後我地去咗酒店一條後樓梯，同我地一齊嘅仲有啲外國人同韓國家庭，大家都表現好緊張。電梯當時都被封鎖，韓國家庭係住喺呢間酒店，解封後酒店工作人員帶佢地上房，喺度好多謝佢地，肯帶埋我地上去客房樓層。當時好多流言，話邊度有炸彈槍手又去咗邊度，只能靠手機留意最新消息。
我地喺走廊逗留咗一段頗長時間，過程中手機開始無電，因為朋友家人都開始打嚟我地keep住報平安，有啲外國人開房門借出佢地嘅充電器以及一啲被鋪俾我地，擔心我地要留過夜。之後我地聯絡到陳太陳淑芬當地嘅朋友，帶咗我地去佢當地office，叫做終於有個地方可以容身比較安全。」從語氣中亦聽得出基仔呢一刻終於鬆一口氣。
基仔接受電話訪問時離開入住酒店，搵緊餐廳食飯，佢表示市面已經回復正常，嗰幾個鐘內其實唔知事發情況係點，亦唔知自己身處嘅地方究竟安唔安全：「成個過程都好緊張，一直留意新聞，因為唔知槍手有幾多個同有無疑犯走甩，事發時Las Vegas所有酒店都封鎖晒唔俾進出。到差不多清晨5點步行返酒店，但老實講個人要步出室外其實都好驚，直至5點幾返到自己酒店房，先真正覺得自己安全啦，成整件事太概歷時6個鐘頭。」
突然來到生死邊緣，基仔亦道出最深感受：「當時唔知自己可以做咩，亦唔知之後會發生啲咩事。特別喺賭檯下面時，我攬住太太，兩個朋友喺旁邊，當時唔知喺其他酒店發生，以為喺身處緊嘅地方有槍擊，只能睇下大家做啲咩跟住做。返到酒店都唔係即刻瞓得着，情緒上仲未平伏，同埋都keep住留意事態發展，另外逐一向朋友家人報平安，佢地有問使唔使即刻安排返香港，但其實除咗Las Vegas所有酒店封鎖，機場都係封鎖咗，航班現時係大混亂，呢兩日嘅交通人流都應該會好亂，要視乎返港航班情況先知幾時返到香港。」
為咗令大家安心，基仔亦有到社交網站留言報平安「經歷六個小時，清晨五時多才能回到酒店，才真正感到完全安全。昨晚，衷心感激Jenthew、Jason和協助我們最終安全回到酒店的幾位人員。要感謝在後樓梯惶恐中仍答應把我們帶上樓層的韓國一家人。感謝給我們水和毛巾的員工。感謝在我們藏身的樓層願意借我們手機充電器和給我們被鋪的外國人John和他太太。願死者安息，傷者早日痊癒。願不要再有暴力事件。」