【有種愛情】張彥博自認好男友　買M巾拎手袋通統做齊

組合SIS樂印姊妹成員駱胤鳴（烙印）新歌《有種愛情》找來張彥博合作，雖然二人笑言唔多熟，且似網友多過似朋友，但拍攝MV時卻默契十足，可惜的是工作人員找來的「臨演」唔多聽話，搞到場面有點混亂。MV其中一幕講述張彥博由背包拎出免仔為烙印製造驚喜，剛開始時都尚算順利，但NG數次後，免仔突然抓傷張彥博，並由他手上脫逃。

換場景後，二人應導演要求躺在床上，期間要不斷說話兼大擺甫士影相，但拍攝中途，阿博突然零反應，工作人員細看下，發現阿博原來真的睡着了。他事後表示因為最近拍劇睡眠不足，所以一見道具床即時閉目養神。為配合《有》所講的甜蜜感覺，烙印同阿博除齊齊以粉紅色情侶裝上陣之後，又頻頻sefie，而其中一幕，阿博更要為烙印買衛生巾。問到會否感到尷尬，阿博就話自己都試過幫另一半買衛生巾，更認為，「男仔點都要做吓，所以唔會尷尬，最尷尬係搵唔到佢用開嘅牌子要問人。」之後阿博更自爆會為女友拎手袋，更表示無論什麼款式都可以carry，皆因「自我感覺非常良好」，並笑言接受能力十分高，而最重要嘅係「如果真係喜歡佢，真係乜都得。」

烙印於MV中，不時同阿博有親密互動，她笑言事先已同男友「跪玻璃」報備：「我今日都有叫佢嚟探班，但佢話怕影響我。」烙印又笑言最想男友吃醋。「佢唔理咪重死，吃醋先證明佢緊張嘛。」