十一國慶塞車被困17個小時　張繼聰苦中作樂：有時間可以思考人生

十一國慶系中國好重要嘅節日，除咗因為慶祝國家成立之外，仲因為香港有得放假一天，大陸就更誇足足放成個禮拜，咁多日假個個都趁機出外旅行走返轉，所以有黃金周之稱。年年十一全國景點都逼到水泄不通，唔好話睇唔到靚風景，就連行都行唔到，就算連萬里長城都企滿人，認真誇張！今年亦都唔例外，廣東省各高速公路由尋晚開始全部都大塞車，交通陷入癱瘓狀態。

黃金周塞車情況老是常出現。（新華社圖片）

近年唔少藝人都北上揾銀，好似張繼聰咁就真系黑仔，佢撞正國慶要返大陸拍劇，本身已經好醒目咁提早出發，但世事點會咁易被你估到，就算凌晨十二點出發都系遇到大塞車，本來車程就3個鐘，司機都系打算delay多3個鐘，大概朝早六點就會到。點知等嚇又等，阿聰足足被困喺車成十二個鍾都只系行咗三分一嘅路程，粉絲都好擔心佢點樣解決佢嘅「生理問題」，塞成十幾個鍾車，附近都冇廁所，就連老婆謝安琪亦忍唔住心痛留言：「辛苦你了！」雖然北上揾銀多，但真系全部都系辛苦錢嚟。

3個鐘又3個鐘，張繼聰終於用咗接近17個鐘由香港去佛山，再加2個鐘車程先去到酒店，聽到都戥佢辛苦，估唔到阿聰都仲識得講笑話：「以後遇到啲咩困難，我唔會再驚，因為塞車塞十幾個鍾都試過，仲有咩要驚！」張繼聰一到酒店，衝個涼就要開工喇，佢就話好多謝大家沿路在社交平台為佢打氣支持，仲好正能量咁話：「其實塞十幾個鍾車都幾好呀，拋開世俗嘅煩囂，欣賞沿途嘅風景，仲可以欣賞得好仔細，因為個風景唔會鬱。」大把時間可以思考人生。