【TVB Secrets】無綫助導超辛苦　冇得沖涼瞓覺兼被人用粗口鬧

在無綫工作辛苦、人工少已不是秘密，但要數最辛苦的工作，非劇集組助理編導莫屬，這個被稱為P.A （Production Assistant），美其名副導演，實則和打雜沒有分別，阿傑（化名）為現職無綫劇集組導演，在這行十幾年，當助導５年後升做導演，親證過最黑暗時期，他說：「呢份可能係全球最辛苦的工作，千禧年入行，人工7500，同期大學生多我5嚿水，而家新仔好似有13000至15000，大學生就一定啦，我試過3日3夜冇沖涼、冇瞓覺，坐車途中瞓得就瞓。當然唔使拍劇，做後期就舒服啲，但剪片間房好凍，因為啲冷氣唔係俾你用，係俾機器，凍到你唔信。」

應該有不少人說過無綫P.A工作是阿四、阿雜，但這個打雜真的很能幹，阿傑說：「譬如要拍一場4個女演員喺沙灘打排球嘅戲，首先你要睇呢4個女仔個期得唔得，會唔會有人同A.A（統籌）mark咗期出去做嘢唔得呢？或者佢同隔籬劇撞咗時間？搞掂人之後，咁場沙灘戲喺邊度拍？清水灣二灘？石澳？荃灣？平日定假日？之後佢哋著咩衫，又要落張服裝單，咁就要望下個劇本，有冇指定邊個著三點式，定係主角要保守啲呢？咁件衫你又要望下，因為一陣服裝阿姐執咗件阿婆泳衣，主角話唔著喎，咁你又要同班女主角講，邊日拍泳衣，叫佢哋醒目，到排球喇，要落張道具單book，記住有book唔一定有，但冇book就一定冇，仲有個網，同埋氣揼，真係會俾個冇氣嘅排球你㗎，又要問下導演使唔使book老臨？如果要，又要搵老臨公司，當你萬事俱備，到現場你就要招呼導演，但而家我講緊一場戲，你一日出外景差唔多拍4至5場戲，你要重複以上嘅嘢，其實好易出錯，出錯後果點？咪俾老闆鬧囉，老闆就係導演。」

P.A工作繁多，有關於拍攝的，都是他的工作範圍，工作量高，不是最大問題，最大問題是壓力，因為你要招呼每一個部門，每一個部門都可以鬧你，阿傑說：「導演、統籌，同組P.A、演員、化妝、道具、服裝、老臨、機器組、剪片、製作聯絡等....我都未數晒，全部一朝早打一個電話俾你，你都冇得瞓啦，仲要喺你出外拍緊嘢，俾導演用粗口問候緊嘅時候，幾十個部門都打俾你，問你嘢，而佢哋亦有權鬧你，你話壓力有幾大？我試過做P.A，book漏咗個連戲電話，俾導演當住50幾人面前，用粗口問候老母，見到你喊，冇用㗎！仲問你：『喊乜X嘢！而家有話錯你咩？你咁X蠢，唔好做啦！」P.A俾導演用粗口鬧喺電視城日日發生㗎，演員都見怪不怪，其實你聽慣咗，你會當粗口係一個好普通嘅助語詞，句句有自己阿媽係正常嘅，哈哈。」

人工低、地位低，壓力大，還要被人問候娘親，那為何有人會入職呢？原來全因追夢，阿傑說：「因為你好想做導演，拍自己嘅嘢，以前拍片唔係而家一個手機就得，阿豬阿狗都話自己係導演，如果你想做杜琪峯、想拍Drama，你唯一途經係TVB，除非你入到電影圈啦，但冇人脈冇家底，你好難入到電影圈，更加唔好話做導演啦，所以就算咁辛苦，都有好多想做導演嘅人入行，雖然流失都好多，因為真係好辛苦，但咁辛苦，TVB劇集組導演係值錢嘅，你就算而家上大陸，你話你自己邊套劇導演，待遇都唔同，因為由P.A升到導演，一啲都唔容易，做足4至5年嘅P.A，古裝、時裝、民初，你都熟晒，冇乜出錯，你嘅組織力，溝通能力應該唔錯，應該冇乜工難到你。」