【阿美利堅有外星人】主持周雅霏一腳踢包辦節目　連投資都自己搵

ViuTv一直都被人忽略，其實當中不少自家製節目都有質素的保證，好似專講外星事物的《阿美利堅有外星人》，由旅遊達人周雅霏(Faye)和嘉賓外星專家卓飛主持，帶大家去美國研究下外星人出現的新聞，看一看UFO的出現，當然不少得介紹一下美國的偏遠景點，係幾好睇架！

除了節目觀賞性高，主持人Faye的觀賞性都十分高，作為香港旅遊節目主持，2011年由英國讀完藝術後回流，擔任過模特兒的她曾獲得中國小姐香港賽區最佳氣質獎。2013年跟拍擋女小雲在nowTV有一個旅遊節目叫做《霏雲闖蕩》，亦出過旅遊書，叫佢做旅遊達人絕不為過。當然，樣靚也是一大賣點，但其實她十分能幹，因為無論《霏雲闖蕩》還是《阿美利堅有外星人》，都是她一腳踢搞出來的產品。

在接受《香港01》訪問時，Faye她說：「前期同後期所有嘢都係我去策劃，連埋我去搵嘉賓卓飛，一開頭節目嘅idea都係自己去做，最後就賣咗俾Viutv。其實由《霏雲闖蕩》呢個第一個節目開始都係由我去plan，由我去實行，所以今次都唔係新鮮事。不過《霏雲闖蕩》嗰陣可能仲細，得21歲，又啱啱開始做旅遊節目，香港media又唔算特別多，所以無咩人察覺。當時已經唔係接job形式，已經係自己plan完，先再外判俾NowTV。（主題曲都自己唱埋？）因為我鍾意個節目完整啲，並唔係話要唱歌出碟，而係我覺得一個旅遊節目，其實應該要有一種好開心，或者好符合節目嘅歌嚟做一一個主題，去包裝個節目。」無論籌備、前期、拍攝、後期，甚至連主題曲都自己唱埋，不得不佩服。

不過，Faye其實在做這個節目之前，一直都抱著懷疑的心態去看這些外星事物，但一路拍，一路體驗，完全扭轉了她對外星人的想法，她說：「一開頭做呢個節目我係諗住希望可以同觀眾同步了解UFO，外星界嘅嘢，因為我自己其實只係入門級，呢個節目都係，節目頭兩三集我啲問題都會有啲挑剔，好多網民都有咁講過，但我覺得好多未接觸過UFO嘅觀眾都會有呢啲問題，因為未接觸過呀嘛。當然隨住每一日嘅旅程，見唔同嘅嘢，真正見到UFO，同啲專家同夜視鏡去睇，嗰陣已經好相信喺我面前真係有呢啲嘢存在。當然，我都想見到外星人，不過我哋而家睇到嘅只係一啲未被確認嘅嘢，而唔係真係有一隻外星人企喺面前，不過學卓飛話，見到都未必有命返嚟。」

一腳踢去做一個節目，不容易，且而用的時間十分多。出過兩本旅遊遊歷書，當中有不少性感相片，不少網民都提議她出寫出，不過Faye就對自己不太大信心：「寫真？出嘅話應該係5年前出喇，而家身材已經走晒樣喇。計劃緊下年書展會出旅遊書加攻略，係有自己風格嘅，始終香港人都係鍾意攻略多啲，對於故事性、遊歷嘅唔算特別多人睇。我仲有個監製嘅節目12月會出街，下年都有幾個呢啲project，主持我都會繼續做。我係今年先開始監製其他節目，平時我剩係負責自己嘅節目，係一個新嘗試。」雖然一路有做監製，但都是自身的節目，對自己負責，將來開始正式踏入監製的行列，為甚麼會鼓起這麼大的勇氣去嘗試呢？「我本身好鍾意旅遊，喺我生命中嘅一部分，我好鍾意睇呢個世界，想喺呢個世界學得更多嘢，但香港人普遍鍾意速食，鍾意日韓台泰，先容易接得多啲job。我其實係唔夠貼地，我好少講呢啲國家嘅美食或者shopping，可能係去吓尼泊爾、伊朗、非洲呢啲比較遠嘅地方，我都明香港人請假好難，短途會啱啲。做到去上年，自己都有諗過，我已經25歲喇，我已經好難再做一個好跳脫嘅角色，又無理由做咁多年都係背包客，我嘅形象已經好難去轉變。我覺得做監製呢個位置去搞唔同嘅節目，同唔同嘅人合作，俾多啲機會自己學習，又可以旅行，呢個位置令我識到更多嘢，文化嗰啲，透過人哋嘅經歷我都有唔少得著。」

好多人會話，「佢屋企有錢先去到咁多旅行，做到自己想做嘅嘢姐」，但原來在Faye心中，去旅行並不需要太多錢，她說：「細嗰喺英國讀書，都會有啲零用錢，都會去吓旅行，同埋我始終係背包客形式，其實唔係真係要用好多錢。當時我開始做節目之前，我都有做過PR，識咗唔同界別嘅人士，當佢哋聽到我要做節目嘅時間，都覺得個idea係吸引嘅，所以會投資落嚟。其餘旅行有時係job喇，有時會自己去玩，不過自己去玩我都唔會係豪洗嗰種。」其實現今機票愈來愈平，去旅行的洗費的確大大減少，大家不妨都試下背包客的形式，可能會有另一番新體驗。