《反黑》點擊超越《使徒行者2》 張建聲：為香港製作出一口氣﹗
今時今日煲劇不再局限於開電視，上網已經可以睇盡全亞洲以至全世界製作。起用超過九成香港演員嘅網劇《反黑》好評不絕，同另一套TVB嘅《使徒行者2》於內地網站都獲得極好成績，截止29號下午《反黑》全國總點擊率至今已破二億，反超勁敵《使徒行者2》。當中飾演大反派「招積」的張建聲 (Justin)都覺得非常鼓舞﹗
《使徒2》有首輯的口碑，卡士又有周柏豪、陳豪、苗僑偉等，續集剛推出時，一嚟就收視點擊高開，所以被一致睇好；不過《反黑》云集一大班實力派演員，既有挾《爸爸去哪兒5》而在國內爆紅的小春做躉，又有因飾演社團大反派「招積」的張建聲 (Justin) 憑演技贏盡各方好評，令《反黑》成功反超前。截至今日下午四時，三套警匪劇在全國網上大廝殺，結果《反黑》之單日點擊率在排行榜上佔第二位，《使徒2》排名第三，至於榜首則為中國製造、由內地演員潘粵明主演之《白夜追兇》。同門師兄弟張建聲和周柏豪穩佔二、三位，旗鼓相當，局面雙贏。
對於要跟同門的周柏豪較技，Justin就表示：「邊有話贏唔贏，最緊要大家有好收視，大家付出都有回報。」但令他意外的是，《反黑》總點擊竟然衝破二億，「意想唔到內地走勢咁凌厲，《白夜追兇》喺國內好紅，始終同聲同氣，港劇冇天生優勢，《反黑》又冇TVB劇嘅根深蒂固，開頭我哋都有壓力，頭幾集因為文化問題，觀眾有啲負評，以為我哋拍嘅係以前嘅古惑仔，睇吓先知原來係用新觀點做。兩億點擊對投資方已經有交代，亦同本地製作出一口氣，因為《反黑》用咗98%香港演員、香港電影crew、香港拍攝手法，希望點擊繼續上升。」
隨着故事發展，「招積」殺社團大佬B吳志雄穿煲被困覊留室，最後因證人被殺而令他逍遙法外，不過社團話事人陳惠敏就要「招積」斬手贖罪，幸得飾演差佬的陳小春相救，其後「招積」會見幕後的外國黑幫，飲下一杯有料紅酒就昏迷，Justin說：「『招積』俾人毒暈後，會被帶去某個地方進行訓練，好多觀眾都緊張呢個角色跟住會點，故事發展唔講得，但可以透露『招積』再出番嚟係佢嘅第三階段，變成近似我最崇拜嘅小丑角色。我好感恩，觀眾咁支持《反黑》同『招積』，當初大家嘅努力冇白費，大家捱更抵夜，拍嘅時候我嘅精神、頭髮、眉毛、身體，基至拍到要睇精神科，呢啲種種，依家一切都值得。」