杜汶澤為愛妻慶祝40歲生日 田蕊妮寫給自己的信留念
不時於網上見到友人抱怨，結婚多年老公變得冷淡，生活乏味，即使是紀念日節慶亦只有循例一句生日快樂，連挑選生日禮物的心思亦欠奉，難怪有7年之癢之說。但世事無絕對，就如杜汶澤田蕊妮拍拖結婚多年依舊甜蜜，9月28日是田蕊妮40歲生日，阿澤為愛妻準備一個驚喜派對，搵嚟一班友包括薛凱琪、唐詩詠、鄭嘉穎、阮兆祥、郭少芸等為壽星慶祝生日，更自揭原來阿田18歲生日時亦有在場。
杜生杜太拍拖18年結婚12年，一直表現恩愛，但原來佢地嘅緣份早於22年前已經開始，阿澤上載合照並留言道：「佢18歲生日嗰一年，響 karaoke搞，我響度，我真係響度！今日佢40大壽，我又點會錯過呢？」阿田則冧爆回應：「我18歲生日嗰年，你係我個friend，今日我40歲你係我老公！緣份嘅嘢！老公，多謝你。」另外上載兩張相片，原來阿澤為愛妻訂製一個靚蛋糕：「佢話我係佢心目中嘅Super Woman 所以要整個Super Women 蛋糕俾我。既然你咁客氣⋯好啦⋯咁我認啦！哈哈！」真係隔住個mon都覺得好sweet呀。
阿澤更上載壽星女唱歌片段，大家都好掛住阿田嘅歌聲呀﹗
年齡就似是女人天敵，25歲被叫中女，35歲已成高齡產婦，要不理旁人眼光活出真我絕非易事。田蕊妮趁40歲生日，寫下給自己的信：「20多歲，總想快點長大！世界只有男朋友跟朋友，常常裝作很成熟喜歡交一些比自己年長的朋友，以為已經歷夠多跟他們說覺得自己很老，幸好他都大方沒有找人打我。
「到了30多歲，進入矛盾一生的過程，想事業好，想婚姻好，想家人好，以為悟到些小人生道理，幫自己定下一個完美的藍圖，對於好與壞有一個個人的標準。直至媽媽讓我深切地經歷了老，病，死。徹底改變了我。
「如今踏入40，我只祈求自己能有一顆慈悲的心，一對智慧的眼，從新出發去面對一切幻象。放輕鬆，帶多點歡樂與關懷給認識與不認識的朋友。未知10年後的當年今日再看到這封信又會是如何呢？」
就似薛凱琪嘅歌曲《給十年後的我》，「快樂嗎 你忘掉理想 只能忙於生活嗎 別太遲又十年後至想 快樂嗎」杜太，生日快樂！