謝霆鋒開talk講發迹 董伯伯撐場講足15分鐘：想成功就學佢！
謝霆鋒除了是歌星影星之外，近年也大搞佢自己嘅節目《十二道鋒味》。今日（9月27日）更受邀出席科技展為他舉辦的「鋒味人生」講座，講下佢嘅奮鬥史，仲順便宣傳下佢新搞嘅創意平台「鋒助人生」。嘩！咁好嘅機會真係唔可以錯過。
攝影：林迅景
講座開頭就當然講下「想當年」啦！首先謝霆鋒就說到「想當年」當錄音拍戲時，用的都是菲林：「以前拍戲氣氛非常之嚴謹，可能宜家就輕鬆啲。嗰時差唔多$2.2一格，每秒起碼100格。」所以遇着林超賢嗰啲大導演都會好嚴肅，講完拍戲成本後，霆鋒就開始說到自己的發迹史。
霆鋒開始搞電影後期公司，開設嘅原因是源於當年自己的MV，在香港找不到技術去做，所以需要外求。而霆鋒就決心自己開設公司去學習這種技術，想當年他賺到首期之後，就把西環的樓宇做按揭去開公司。但是好景不常，3年之後正值是轉型數碼的時期。霆鋒説：「當時所有買二手器材都用唔到，想當然就係蝕咗好多錢...之後辛苦咗8年DD（數字王國）就話好欣賞我嘅網絡，想收購我間公司。」之後霆鋒表示，想起了「引進先進技術的初衷」，才建立他的後期製作公司，所以最後就決定與DD合作。霆鋒話：「兩年之後參加《速度與激情7》（港譯：狂野時速7）等嘅製作。」
講到呢度係咪好感動呢？謝霆鋒講完開公司，仲「順便」講下自己在「飲食」上的抱負。更用英文說：「We have nothing，nothing is Chinese。That's a big problem，and it sucks。」之後才解釋道：「我希望可以用『鋒味』嚟建立我哋自己嘅美食品牌。例如賣走地雞嘅會有QR code。掃一掃就可以知道隻雞喺邊度嚟，同埋佢嘅居住環境。」說到這裏，全場仲拍曬手掌添！睇嚟大家對佢呢個意見都十分認同。
原來，前特首董建華都是「鋒助人生」的協助人之一，今日亦有親身來到現場。當謝霆鋒介紹董伯伯時，更形容對方「盡心盡力」，幫手找資助。而董伯伯聽完也説，「我聽完（演講）之後都好感動！」更盛讚霆鋒：「霆鋒係年靑人學習嘅好榜樣，想成功就學佢。」嘩！連董伯伯都開金口讚佢，今次一定掂啦！