FB信息隨時跌入黑洞 倪晨曦黃建東踩中陷阱
香港地做生意，好多人唔一定有官方網站，卻需要一個Facebook專頁，香港700幾萬人口，每月活躍用戶超過500萬，好多人慣性有咩查詢都會inbox提問，但原來有個致命陷阱，令專頁有機會錯失大量客戶查詢！藝人倪晨曦同黃建東都深受其害：「足足miss咗幾百個信息呀！」
最近有網友意外發現，部分用戶傳送之信息，會被Facebook過濾至「其他」的分類，情況就如電郵中之雜件箱。但「其他」分類收件匣，看似貼心地為大家過濾郵件，但最大陷阱是，此分類未能於網頁版或Facebook官方apps中顯示，只能用手機網頁瀏覽器查看。唔少FB PAGE管理員大吐苦水，話這個陷阱好可能隱藏不少客戶查詢，實在損失慘重。
原來唔少藝人一樣因此而蒙受損失，甚至被誤會揀job耍大牌，黃建東就係其中之一：「之前二創片段喺網上熱播之後，發現原來好多客戶都會利用FB inbox搵我，包括周年晚宴EMCEE工作、一啲廣告拍攝，仲有表演嘉賓等等，我頭先見到miss咗一堆MSGS，有D喺半年前傳過嚟，我都有即刻覆返唔好意思而家先見到個信息，但客戶好多都已經搵咗其他人做，仲話以為我對個job無興趣所以唔覆。對我嚟講接唔接到呢個job唔係最大問題，而係唔想俾D客覺得我好大牌，好似唔稀罕呢個工作，絕對唔係咁架，我對大大小小嘅工作都非常着緊，保守估計都損失咗五位數字，自己會check番多D密D，希望唔會再有呢D問題發生。」
選美出身的倪晨曦（Elva），身兼演員、模特兒、節目主持及瑜伽導師多職，更被網友封為「IG女神」，原來佢都誤墮呢次嘅陷阱：「大約有200至300個信息跌咗入呢個收件箱，中間大概一半係有關工作查詢，好在大部分有轉用電郵或其他渠道聯絡同事，損失未算太大，而家希望盡快回覆返呢D訊息，亦都希望唔好咁多同類事情發生。」
到底點樣可以查詢到呢D跌入二次元空間嘅信息呢？大家必須要用「手機」嘅Safari或Chrome瀏覽器，輸入自己Facebook Page網址，選擇活動>訊息>收件匣，左上角位置會有一個選項，揀番「其他」先會睇到被隱藏嘅信息。葉翠翠根據呢個方法check咗，只得幾個失蹤信息，可謂不幸中之大幸。