【TVB Secrets】新人賣橋被ban 　前編劇：佢地話50歲師奶睇唔明

上篇提到無綫請編劇超難，入職後當見習編劇人工超低，不會高過1萬2千蚊，做新人人工低其實是正常的，尤其在香港從事創意產業，但究竟無綫編劇返工做咩呢？再請前無綫編劇阿巢（化名）為大家解說：「睇你跟邊個啦，有啲返朝九囉，但多數返11點幾，其實度橋都幾開心，喺間房入面，有個好大嘅白板，紅色、藍色、黑色side pen擺晒喺度，新人通常有部電腦mark低大家講過乜，大量零食呢啲必須啦，煙仔而家就唔食得嘅，３點幾新人多數負責去西餐廳買下午茶返嚟，開工就編審、編劇、新仔都坐埋一齊，有時套劇嘅監製都坐埋嚟jam下囉，大家喺到乜都傾，以20集劇本為例啦，一集大約30場戲，總共６百幾場戲，你冇可能一個寫哂，所以一定係每人都寫啲，通常日頭傾好分場，咁就夜晚返去寫，套劇嘅前期好輕鬆，夜晚7、8點收工，愈近開拍就大鑊，11點甚至更夜都未收，因為又要度又要寫。」

創作的確需要新思維，TVB好積極請新人，但新人發揮機會，反而不多，亦因為制度令他們由創意澎湃變成墨守成規，阿巢說：「初時真係以為可以天馬行空，我哋成班同期新人掟好多新嘅idea出嚟，當然未必個個都work，有啲真係幼稚嘅，但上面嗰班同我哋講，我哋嘅target觀眾係50歲或以上嘅師奶，你哋諗呢啲佢哋唔明！嘩！真係咩熱血呀、激情呀俾佢淋熄哂，大佬！目標觀眾唔可以set年青人㗎？真係想同佢哋講，50歲師奶都好有要求㗎，我阿媽睇咗咁多年TVB，都轉去睇星星《來自星星的你》，睇宋仲基啦，師奶都變咗喇，咁新嘢佢哋唔要，咪俾返以前嗰啲A餐、B餐，佢哋熟悉嘅嘢囉，咁你慢慢就....變成佢地咁，一樣收廿幾點收視，但係咪代表好呢？有新人試過好大膽咁講自己意見，用好禮貌方式同編審唱反調，但結果被人調走咗，咁你話做新人仲邊敢出聲呢？」

無綫劇集經常被網民發現橋段熟口熟面，甚有抄人之嫌，但阿巢話這個抄人風氣，自古以來都有，最大問題是他們覺得冇問題，他說：「佢地唔係唔知抄人，而係佢地覺得抄人冇問題先係最恐怖！成日度緊某的場景，示愛呀，槍戰呀，突然諗起邊套戲都睇過喎，就索性成條橋搬落去，加少少嘢都唔會㗎，最好笑佢同你講，發哥《上海灘》好經典啦，嗰場搶趙雅芝，咪又係抄《畢業生》，個個咪當神咁拜，冇事嘅，用啦！咁咪成日俾人睇唔起囉！當然有啲係逼於無奈，無綫係劇集工廠，20集嘅劇大約3個月拍完，一日廠景、外景加埋要拍20頁紙，天才都冇可能諗到咁多橋，以前呢套未度完，已經要度下一套，而家就好好多，俾時間你做下資料搜集，以前冇計又冇時間，咁最好方法係咩？抄囉，都係嗰句啦，一台獨大，每年億億聲咁賺，公司自然用最快捷嘅方法啦。」