男業主千五蚊合租500呎屋指定要女性？　拜金Seasun：佢想識女　

土地問題不止影響到日常的生活，甚至連交朋結友，識下女仔都困難重重。試問如果一位住緊70呎劏房的後生仔，又那有自信帶個女仔返屋企。近日有位巴打諗到條絕世好橋，減輕租金的負擔外，還可以識到女仔，一舉兩得，不過網民就笑這位巴打「太傻、太天真」，而今年初無綫節目《有樓萬事足》的受訪者Seasun，知悉這個古怪分租Post後，更笑稱「我自己都放盤」，講緊層樓啫，大家不要心邪。

出分租Post的網民，表示家住上水古洞，希望將現時500呎的租住單位分租，租金就1500元，共用廚廁兼且包水電，齋聽到上述條件確是十分吸引。但之後的租住條款卻相當古怪，首先只限租給單身女性，而單位只得一房一廳，他會瞓廳，而女租客就瞓房，女租客亦不能帶男仔回家。除此之外，他強調自己已經單身兩個月，究竟跟分租單位有何關係？令人百思不得其解，而古怪要求陸續有來，這位巴打還要求女租客先付3千元抵押金，作為一個月按金及上期。

網民對這位有意分租的巴打，一面倒留言嘲笑，「搵租客定搵對象？」、「佢咪好著數」、「單身女仔好危險喎」，甚至不信是真心放租。在節目中一句「有樓有高潮」被指是拜金女的Seasun，卻指絕對不會租這個盤，原來現時她已經上了車，還是一個港島區400呎新盤，售價近千萬，她接受《香港01》訪問，「我梗係唔會租啦，依家都有樓，我自己都放盤。(諗住賣什麼價錢？)最好係價高者得。」

Seasun現時為Uplive擔任主播，主要是教人物業上車及星座運勢，她更稱將會到北京試鏡，參演情色版的《紅樓夢》，「我覺得嗰個人應該想識女仔，你諗下幾開心呀，次次返到屋企都見到個女仔喎，不過建議佢都係出去dating啦，唔使見嚟見去都係同一個人。」Seasun表示未售出自己的單位前，都會傾向放租，對象是學生，問到她若然單位出售或放租，那麼她會搬到那裡居住，「周圍都住下，我成日唔係香港，拍嘢都係周圍飛，唔鍾意stay係一個地方，愈熟悉愈瞓唔著。」今年2月在《有樓萬事足》的節目中，Seasun才說拍拖結婚對象是要有樓階層，還要2千呎起錶，想不到短短時間Seasun已經是上車人士，要「高潮」原來話咁易。