【使徒行者2】55歲黃文標有穩定女友　做奸角慘被伯母誤解係衰人

「御用收數佬」黃文標的奸人形象深入民心，曾經試過有日本留學生、韓國人在街頭見到他，紛紛上前表示認得他、知道他是香港演員，算是苦中一點甜。不過，做得奸人太多，日常生活卻變成了煩惱。黃文標與女友拍拖接近8年，卻與女方母親接近零交流，皆因他是個演員，而且是做開奸人的演員。

「做開奸人，初頭認識新朋友嘅時候，佢哋都會以為我好惡，都要經過一段時間了解咗之後，先會覺得我唔係想像中咁惡。」不過引伸到感情上，女友不介意，但伯母介意：「其實都唔怪得嘅，有啲行業係會畀人有牢固印象，就好似演員咁，畀人覺得身處一個花花世界，以為係用情不專嘅人。」被伯母誤解，黃文標最初都有點無奈：「我同佢8年來都冇咩交流，往往佢畀我嘅反應都好冷淡。」黃文標眼見情況不太理想，自己不敢輕舉妄動：「唔知佢會唔會唔聽我電話，直接CUT我線！（會唔會唔開心？）點都會有少少嘅，但我又唔會因為咁去放棄呢段感情。」所以8年之後，黃文標打算曲線挽救與伯母的關係：「女朋友開始會幫下口，由佢把口講下我啲嘢，應該會好受啲嘅。又或者大時大節，買啲嘢送畀佢，希望佢會開心喇。」這堪稱是一場持久戰，黃文標說：「係要時間慢慢嚟，況且冇辦法㗎喇。」

黃文標50歲才離巢TVB，他不介意遲了才往外闖，但女友介意嗎？「佢自己有生意做，其實都唔需要我養。佢都唔介意我收入係點，因為大家都係各自各洗，財政獨立嘅。」大家有共識就當然好，不過作為一個女人，唔會想男方畀自己一個名份咩？黃文標說：「我都明白女人會咁諗，都係正常。我同佢嘅感情一路都好安穩，點都會有呢一日嘅（結婚），都想有自己嘅家庭，但而家就未有呢個諗法，未係時候。」雖然未打算成家立室，但黃文標有個獨立又識諗嘅女友，都好幸福。