【使徒行者2】歡喜哥開直播話陳煒太快死：可以再交代得多啲

隨住TVB有Big Big Channel出現，演員有劇出街，都會巡例開下直播同fans傾偈。《使徒行者2》近日出街，當然唔例外喇。好似歡喜哥許紹雄，他昨晚就首次開live，同觀眾見下面，不過可愛的事情就發生了。

Benz雄第一次直播，好多功能都未識用，自己直播咗都未知，見到他打電話向友人求救，講到：「我咩都睇唔到喎！」後來見到自己個樣先同朋友收線，笑言：「自己都唔係好識點用！」他在直播期間非常得意地話：「我有老花同近視，唔係好見到大家講咩。」、「啲字（網友留言）跳得好快，睇唔返！」睇唔到網友留言的歡喜哥，最初不知網友反應，不過有人送出讚好手勢，又畀錢送朱古力同波板糖，所以歡喜哥話：「呀！我見到你哋畀手指公，知道大家都覺得好睇。」接觸新事物的歡喜哥邊講邊笑，真係勁可愛。

歡喜哥回顧第2集劇情，講到他的老婆陳煒好快就被殺死，他就坦言其實煒哥太快死：「劇情個邊可以交代得多啲，咁煒哥可以死得眼閉，但係而家好似講少咗啲嘢，就好似死得唔係好眼閉。」不過，歡喜哥都大讚《使徒行者2》製作比第一輯好，而他又非常謙虛話：「我自己都有啲不足，但都過咗去喇，下次再做好啲喇。」點都好，見到歡喜哥咁得意，心情都好啲。