【使徒行者2】摩斯密碼邊有咁簡單 　卓Sir拍榴槤係用使徒密碼？

無綫重頭劇《使徒行者2》昨晚首播，玩到爛的摩斯密碼，繼續出現，昨晚有一幕是講卓Sir（苗僑偉飾）在曼谷的榴槤檔見到洪永城飾演的Wing翔時，就用枝棍仔敲打榴槤給對方信息。自從睇過電影《無間道》之後，相信觀眾一見到這些神秘而又有規律的敲打或拍打聲，都會覺得是在用摩斯密碼溝通，這種想法亦好正路。而卓Sir拎住個榴槤，簡單敲了幾下扮揀榴槤，原來就已經講出了「九指強，改變行程」，之後他又用枝棍仔篤了個榴槤幾下，就講了「目的地，泰廟」。嘩，就算不認識摩斯密碼，都會知道要打摩斯密碼即使打一個單字也不止幾下啦，卓Sir打幾下就交代到這麼多資料，有無咁勁啊？豈非仲勁過摩斯密碼？

到劇集中段又有一幕是何雁詩所飾演的雀雀，拿起枕頭拍打了幾下就打出了「8031」，別以為4個數目字可以打幾下就打到，打個8字都唔止啦。唔通卓Sir與他的手足們其實不是在用摩斯密碼，而是有一套專屬他們的使徒密碼？雖然睇劇從來都不應該咁認真，但其實也是否可以唔好咁hea？拍多幾下拍長些迫真些可以嗎？觀眾肯認真去睇都代表尊重套劇㗎嘛。

香港01記者就訪問了3位有關這方面的專家，問問他們的專業意見，3人都異口同聲表示摩斯密碼無可能打幾下就能交代到劇中要交代的信息。澳門國際軍事學會會長黃東說：「我都有睇尋晚嗰集，除非佢哋本身有一套暗號，唔係嘅話無可能打幾下就講到咁多嘢，我諗都係純粹想交代佢哋有用摩斯密碼溝通，但就唔係話嗰幾下真係個信息內容，咁樣好誇張，得啖笑，睇完一笑置之咪算，打幾下真係會聽到一嚿雲，笑話嚟。其實用暗號喺間諜世界好平常，但當然唔會好似劇中咁混亂啦。其實呢類密碼都係通過不同音頻、燈光、無線電長短组合傳遞訊息。我最記得民用S0S世紀初已經停止使用，不過呢個係國際通用求救訊號，唔係密碼了。」

而中大信息工程學系助理教授周斯明亦解釋摩斯密碼會有一定長度。另外，電腦保安研究人員賴灼東也表示：「梗係唔會啦，一定唔會係敲幾下咁簡單，有啲字係可以有簡稱，但都唔可能咁短囉。」他又謂摩斯密碼仍是現今最常用的訊號代碼：「用電筒照長光短光打SOS呢個一定要識，係求生本能最基本。」